كرسى الاعتراف "معانا العضوه المميزه D&ampH"

soma* كتب:: ازيك يا ساره
ازيك يا سوما يا قمر

انا قريت ردودك وبجد عجبانى ردودك وصرحتك اوووى
يارب يخليكي بجد ده من زوقك

قوليلى بقى يا ساره 000
ايوه يا قمر

انتى بتخافى تحكى مشاكلك اللى جواكى لحد ؟؟
ساعات كتير اوي بخاف احكي لحد عشان محدش يدايق مني

اخر مره بكيتى فيها كانت امتى ؟؟
كانت من يومين

ممكن اعرف نقطة ضعفك ايه ؟؟
الحب سواء حبي لاصحابي او اخواتي او حبيبي (لما يكون في)
والخيانة كمان بتخليني مقدرش اسامح لو بموت من فراق اللي خاني

كم مره اتخنقتى من المنتدى وطلعتى منه بسبب شئ معين ؟؟
3 او 4 مرات تقريبا

بتخافى من الضلمه ولا لأ ؟؟
من ساعة ما صحيت في مرة مخضوضة في الضلمة كان في انفجار لأنابيب بتوجاز تقريبا بعد بيتنا
بمسافة قريبة بقيت كتير اخاف منها

اديتى الباسوورد بتاع ايميلك لحد قبل كدا ؟؟
لوحدة صحبتي والكلام ده من يوم واحد بس

انتى عشتى 22 سنه اتعلمتى ايه من الدنيا ؟؟
اتعلمت مثقش كتير في حد ومبقاش طيبة واني الخيانة كتيرة اوي في الزمن ده
ومفيش حب وصداقة كتير واتعلمت اني مفيش حد هيحبني بجد لاخر يوم في عمره غير امي واخواتي وطبعا لو كان والدي موجود علي قيد الحياة اكيد كان هيحبني

نوع موبايلك ايه ؟؟
نوكيا

نغمه موبايلك ايه؟؟
قصاد عيني عمرو دياب

عامله كول تون ولالأ ؟؟ لو عامله كول تون ايه الاغنيه ؟؟
عاملة اغنية بعيد عن عيني لتامر حسني من الالبوم الجديد

دا اللى جه فى بالى دلوقت لو افتكرت حاجه هرجعلك تانى
اكيد مستنياكي في اي وقت واسئلتك بجد جديدة وحلوة اوي

سلام بقى يا قمر
سلام يا احلي سوما

سارة انا قصدى عمتاا فى الحياه
مين اللى جارحك وانتى مقدرتيش توجهيه بكده ؟؟؟

اميرة الحب كتب:: سارة انا قصدى عمتاا فى الحياه
مين اللى جارحك وانتى مقدرتيش توجهيه بكده ؟؟؟
ليدر الأسرة بتاعتنا

انتى لسه مذنبينك على الكرسى

اسالك شويه اساله قبل ما تقومى

صيفتى فين السنادى ؟؟؟؟ولا لسه مصيفتيش ؟؟؟

اجمل رساله جتلك على موبايلك ؟؟؟

مسميه البلوتوث بتاعك ايه ؟؟؟

اشتركتى فى كام منتدى قبل مانوس ؟؟؟؟

ايه الفرق بين المنتديات اللى كنتى فيها وبين مانوس ؟؟؟

ايه الحاجه اللى ندمتى عليها وبعد فتره ندمتى انك ندمتى عليها ؟؟؟

عندك كام اسم على الميل بتاعك ؟؟؟؟

كفايه عليكى كده

سلام يا قمر

soma* كتب:: انتى لسه مذنبينك على الكرسى
اه يا عيني لسه

اسالك شويه اساله قبل ما تقومى
اسألي طبعا زي ما انتي عايزة

صيفتى فين السنادى ؟؟؟؟ولا لسه مصيفتيش ؟؟؟
والله لسه ومش عارفة ظروف شغلي هقدر اسافر ولا لا

اجمل رساله جتلك على موبايلك ؟؟؟
رقة الورد من رقة انفاسك يا تريد دا طبع الورد ولا الورد بيقلد احساسك
مش هقول وحشتني لانك علي طول معايا هقولك ملكتني يا اجمل احساس جوايا
سحابة حب يا عمري تمطر في سما دنياك تعطر قلبك الصافي وتقولك مستحيل انساك
وفي رسايل تاني بس انجليش

مسميه البلوتوث بتاعك ايه ؟؟؟
والله موبايلي اصلا مفهوش بلوتوث

اشتركتى فى كام منتدى قبل مانوس ؟؟؟؟
مش فاكرة بس مش كتير

ايه الفرق بين المنتديات اللى كنتى فيها وبين مانوس ؟؟؟
حبيت منتدي مانوس اكتر والناس اللي فيه

ايه الحاجه اللى ندمتى عليها وبعد فتره ندمتى انك ندمتى عليها ؟؟؟
اني رفضت حب انسان كان مستعد انه يجيب الدنيا كلها عشان اوافق عليه

عندك كام اسم على الميل بتاعك ؟؟؟؟
33 اسم

كفايه عليكى كده
سلام يا قمر
سلام يا قمر انتي كمان

الشكر كل الشكر

لعضوة المميزة

اجاباتها صريحة وواضحة

وان كان بها بعض القصور شوية

المهم انها استمتعت واخدت راحتها وفضفضت

wae4

الدور النهاردة مع المشرف العام

المميز اوى

مش هتقدر تقفل البلوتوث

m@7moud

منور الكرسي يا حودة

طبعا حودة الضيف بناءا على رغبات الاعضاء

المايك معاك يا حودة لمدة اسبوع

ظبطوه صح عشان خاطري

قشطة يا هااااااااااااااااااااانى

واى حد عايز حاجه يلحق بقا

لولولولوي
حوده علي الكرسي يا مرحبا يا مرحبا
ازيك
عامل ايه
يارب تكون بخير
يلا نخش علي الاسئله

1-بطاقتك الشخصيه؟
2-مين هو حوده فون؟
3-ايه اكتر صفه بتحبها فيك؟
4-ايه اكتر صفه نفسك تغيرها فيك؟
5-عندك كام صاحب؟
6-عندك كام صاحبه؟
7-عندك كام اخ؟
8-عندك كام اخت؟
9-بتحب مين اكتر والدك ولا والدتك؟
10-ايه لونك المفضل؟
11-مين مطربك المفضل؟
12-مطربتك المفضله؟
13-ممثلك المفضل؟
14-ممثلتك المفضله؟
15-ايه اكتر قسم بتحب تدخلوا في المنتدي؟
16-وزنك قد ايه؟
17-طولك اد ايه؟
18-ايه اكتر فيلم بتحب تتفرج عليه؟
19-ايه اكتر اغنيه بتحب تسمعها؟
20-مقاس جزمتك كام ؟ (بلاش كدب)
21-هيل مررت بقصه حب وفشلت؟ ومين كان الغلطان؟
22-هل حوده فون يمر بقصه حب حاليا؟
23-لو كنت المدير بتاع المنتدي كنت هتغير فيه ايه؟
24-ايه رايك في اعضاء المنتدي؟
25-مين هما الاعضاء اللي بتحبهم في المنتدي؟
26-ايه رايك في الاعضاء دول

هاني
سكوفيلد
فري تو مانثس
انج اسلام
مانوس(الادمن)
هيثوم
ايهاب عادل
روما
هانا مونتانا
جوليان
سبعاوي
مون لايت
فانتوم
احمد نافع

يلا كفايه عليك كده النهارده هرجعلك

حوده علي الكرسي يا مرحبا يا مرحبا
ازيك
عامل ايه
يارب تكون بخير
يلا نخش علي الاسئله

* الحمد لله كويس ازيك انتا ياباشا منور والله

1-بطاقتك الشخصيه؟

* الاسم -- محمود عبدالحميد
* تاريخ الميلاد -- 1/8/1990
* مكان الميلاد -- الشرقية . الزقازيق
* بس كده ..

2-مين هو حوده فون؟

* الاسم هانى هوا اللى مطلعه تقريبا وبدا يتداول
فى اواخر السبعينات هههههههههه
وطلعه عشان النغمات
انا فعلا حياتى فى النغمات وماقدرش اسيبها

3-ايه اكتر صفه بتحبها فيك؟

* النشاط ..

4-ايه اكتر صفه نفسك تغيرها فيك؟

* الغرور

5-عندك كام صاحب؟

* يااااه ماخدتش من الدنيا غير صحاب
حوالى 50

6-عندك كام صاحبه؟

* 19 من الجامعة
* 4 من صحاب صحباتى بتوع الجامعة
* فى كتير بقا من النت ومن مانوس

7-عندك كام اخ؟

* ولا اخ للاسف

8-عندك كام اخت؟

* 3

9-بتحب مين اكتر والدك ولا والدتك؟

* اكيد الاتنين

10-ايه لونك المفضل؟

* البينك ( الوردى ) ..

11-مين مطربك المفضل؟

* تامر حسنى --عربى
* انريكى ليجاسس -- اجنبى

12-مطربتك المفضله؟

* شيرين --عربى
* شاكيرا --اجنبى

13-ممثلك المفضل؟

* محمد سعد --عربى
* توم كروز --اجنبى

14-ممثلتك المفضله؟

* مى عزالدين -- عربى
* جوليا روبرت -- اجنبى

15-ايه اكتر قسم بتحب تدخلوا في المنتدي؟

* النغمات طبعااا

16-وزنك قد ايه؟

* 70 كيلو

17-طولك اد ايه؟

* ماعرفش بس طويل

18-ايه اكتر فيلم بتحب تتفرج عليه؟

* step up 2 the street

19-ايه اكتر اغنيه بتحب تسمعها؟

* تامر حسنى -- انا مش عارف اتغير

20-مقاس جزمتك كام ؟ (بلاش كدب)

* 43 -44 تقريبا بس مش اكتر من كده

21-هيل مررت بقصه حب وفشلت؟ ومين كان الغلطان؟

* اه مرتين وانا الغلطان فى المرتين

22-هل حوده فون يمر بقصه حب حاليا؟

* اه اكيد .. ربنا يسهل

23-لو كنت المدير بتاع المنتدي كنت هتغير فيه ايه؟

* كنت هحول منتدى فى بى بس

24-ايه رايك في اعضاء المنتدي؟

* ناس زى العسل

25-مين هما الاعضاء اللي بتحبهم في المنتدي؟

* خايف انسا حد يزعل منى
* بس بحب الاعضاء كلها

26-ايه رايك في الاعضاء دول
هاني

* هانى ده من حبايبى فى المنتدى كل يوم لازم نتخانق
هوا يقول يمين انا اقول شمال

سكوفيلد

* حبيبى برضه دايما بيعارضنى فى كل حاجه مش اخو
هانى بقا

فري تو مانثس

* اخويا الكبير فى مانوس دايما بشتكيلوا من الادارة

انج اسلام

* ياااه حبيبى اوى وبفرح اوى لما برفع حاجه قبله
وهوا فى الشغل
ههههههههههههه وهوا عارف كده

مانوس(الادمن)

* عمرى ماطلبت منه طلب وقلى لأ
بجد راجل تمام اوى وعمره ماقلى على حاجه غلط
ودايما باخد رايه فى المواضيع الكبيرة الجديدة
** وكمان بيكيمنى كتيير اوى **

هيثوم

* الوحيد اللى فى الادارة ماتعرفتش عليه
بس هتعرف عليه قريبا انشاء الله

ايهاب عادل

* ملك البوابه - حبيب قلبى برضه
مواضيعى الجديدة كلها عنده

روما

* ياااااااه روما دى حاجه كده لوحدها
بنت زى العسل اوى بعتبرها اختى الكبيرة

هانا مونتانا

* عسوله مانوس روحها حلوة اوى
دمها زى العسل بجد

جوليان

* من اول الناس اللى عرفتها فى مانوس
صاحبى اوى ورجل جدا جدا
وانشاء الله رايحلوا اسكندرية مخصوص

سبعاوي

* صاحبى بقاله يجى 8 ولا 9 سنين
دايما مع بعض
وهيمسك الموبايلات من بعدى

مون لايت

* مكلمتهاش قبل كده الحقيقة
بس اسمع انها بنت مؤدبه جدا
وكمان روحها حلوة

فانتوم

* علطول بنشتغل بعض فى الشات

انا المستحيلة بذاتها

* ندى دى بقا بحب اشتغلها اوى
وامسكلها على الوحده فى الشات
واحب اضايقها اوى واخليها تمشى من الشات
وده اللى بيحصل كل مرة

احمد نافع

* واحد ملوش لازمة اصلا فى مانوس
بس نعمل ايه يعرف اسلام
وهيكون اول واحد هعمله بان لما اكون مراقب

(( انتا طلبت الصراحة ))
هههههههههههههههههههههههههههههههههههه

لا بهذر طبعا احمد ده روح تانية لمانوس

يلا كفايه عليك كده النهارده هرجعلك .

* دانتا فاضى على كده ههههههههههههههه تنور يا سيدى فى اى وقت

وانا معدية من جنب الكرسي لقيت نور جامد اوي

فدخلت اشوف ايه الحكاية

فببص

ايه ده مش معقول العسل كله علي الكرسي

ازيك؟؟

عامل ايه؟؟

منور الكرسي يا قمر

هسالك كام سؤال صغنين

1-ايه اكتر موقف مضحك حصلك قبل كده

2-ايه اكتر موقف زعلك

3-ايه اكتر موقف احرجك

4- نوع موبايلك ايه؟؟؟والموديل؟؟

5-معاك اد ايه رصيد دلوقتي؟؟

6-ايه الرسالة اللي اتبعتلك وعجبتك اوي؟؟؟

7- ايه الحاجة اللي عملتها وندمت عليها؟؟

بس كده

علي اللي ما اكنش رخمت وطولت عليك

ويلا اشوفك علي خير

يلا سلام

وانا معدية من جنب الكرسي لقيت نور جامد اوي

فدخلت اشوف ايه الحكاية

فببص

ايه ده مش معقول العسل كله علي الكرسي

* دايما كده بتحرجينى بكلامك

ازيك؟؟

* تمام

عامل ايه؟؟

* الحمد لله كويس

منور الكرسي يا قمر

* ده نورك والله

هسالك كام سؤال صغنين

* بس كده براحتك اوى

1-ايه اكتر موقف مضحك حصلك قبل كده

* فى مواقف كتير اوى مضحكة عديت بيها
بس اكتر موقف بجد موتنى من الضحك
يوم نتيجة الثانويه العامة السنه اللى فاتت
لما لقيت واحد صحبى جايب 46.5 %
ههههههههههههههههههههههههههههههههههه
بجد الموقف ده كل مافتكروا بضحك لان انا
اللى جايبلوا النتيجة
هههههههههههههههههههههههههههههههههههه

2-ايه اكتر موقف زعلك

* ماعتقدش ان فى حاجه زعلتنى

3-ايه اكتر موقف احرجك

* كنت فى تاكسى انا وصحابى
وجينا ننزل ماحدش فينا كان معاه فلوس للتاكسى
كل واحد كان معتمد على التانى
هههههههههههههههههههههههههههههههههه
السواق شتمنا ومشى
بجد ساعتها كنت محرج جدا جدا

4- نوع موبايلك ايه؟؟؟والموديل؟؟

* الموبايل نوكيا
N73 - Music edition

5-معاك اد ايه رصيد دلوقتي؟؟

* لسا شاحن هما 10 جنية غلابة

6-ايه الرسالة اللي اتبعتلك وعجبتك اوي؟؟؟

* الرساله دى
" الاقلاع عن التدخين .. قرار صعب .. يحتاج
لكأس وسجارتين .. "
ههههههههههههههههه جامده

7- ايه الحاجة اللي عملتها وندمت عليها؟؟

* مابندمش على اى حاجه عملتها

بس كده

علي اللي ما اكنش رخمت وطولت عليك

* تنورينى فى اى وقت يا قمر

ويلا اشوفك علي خير

يلا سلام

* مع السلامة

اية دة حودة

منور

عامل اية

انا عملت حسابي و جايبلك معايا كرسي الاعتراف

اصل هاني دة نصاب ممكن يكون خده لية

كرسى الاعتراف "معانا العضوه المميزه D&ampH" - صفحة 28 321c18d67d

كرسى الاعتراف "معانا العضوه المميزه D&ampH" - صفحة 28 321c18d67d

كرسى الاعتراف "معانا العضوه المميزه D&ampH" - صفحة 28 H2_1982.60.89

ودة كرسي ليا انا

علي قدي

ندخل علي الاسئلة

مين اكتر انسان بتحب تحكي معاة؟

عندك كام اخ و اخت؟

كام مرة حبيت بجد؟

اية هوا الحب بالنسبة ليك انت؟

اية مواصفات شريكة حياتك؟

قول كلمة لمصر؟

قول كلمة لمنتدي مانوووس؟

قول كلمة لمامتك؟

قول كلمة لباباك؟

قول كلمة لكل اخ واخت ليك؟

قول كلمة لصاخبك؟

مين اكتر عضو في مانووووس بتحيه؟

مين اكتر عضوة في مانوووس بتبها؟

ممكن تحب واحدة من النت و ترتبط بيها؟

انت ترتيبك اية بين اخواتك؟

لو انت الكبير اية دورك ؟

قولي جملة علي كل عضو:

محمود فتحي؟

ايهاب عادل؟

فانتوم؟

محمد اونلي؟

دودي؟

اية اكتر اداري في مانوووس عامل مجهوود ؟

يالا بقي سلام

هجيلك تاني

سلام

استني اخد الكرسي بتاعي

كرسى الاعتراف "معانا العضوه المميزه D&ampH" - صفحة 28 H2_1982.60.89

سلام

[/center]

منورنى يا دودى والله
وشكرا على دخله الكراسى دى
بدل ماتجيبلى هديه جايبلى كرسيين
ماشى
ههههههههههههههههههههههههههههههههه

مين اكتر انسان بتحب تحكي معاة؟

* بحب احكى اوى مع محمد صحبى اللى هوا
سبعاوى هنا وبقولوا على كل حاجه

عندك كام اخ و اخت؟

* 3 بنات بس

كام مرة حبيت بجد؟

* مرة واحدة

اية هوا الحب بالنسبة ليك انت؟

* الحب بالنسبالى --جواز

اية مواصفات شريكة حياتك؟

* اتمنى تكون بيضه + شعر اصفر + دم خفيف + عيون واسعه + واهم حاجه تكون بت روشه كوول يعنى هههه

قول كلمة لمصر؟

* احب اقول لمصر وكل المصريين

** حوده فوون هيشهيصكم غصب عنكم **

ههههههههههههههههههههههههههههههه

قول كلمة لمنتدي مانوووس؟

* نفس الكلمة بتاعه مصر انظر فوق

قول كلمة لمامتك؟

* ست الحبايب يا حنانه انتا

قول كلمة لباباك؟

* احب اقول لبوبا ياريت يحولى خطى بزنس
ويدفع هوه الفاتورة .. وكمان ياريت يدفع
البنزين بتاع العريبة كل مرة
هههههههههههههههههههههههههههههههههههههه
اه نسيت ياريت بقا لو يفكوا منى

قول كلمة لكل اخ واخت ليك؟

* يوووه دانتا بتتكلم كتير اوى ** احب اقولهم محدش
يزعل منى فى حاجه ** واللى زعلان يخبط راسه فى الشكمان** ههههههههههههههههههههههههههههه

قول كلمة لصاحبك؟

* احب اقول لصاحبى زى ماقالت الست نانسى
** يا صاحبى يا انسان هنا او فى اى مكان
ببعت رسالتى ليك رد عليا وبلاش كلمنى شكرا
ههههههههههههههههههههههههههههههههههههههه

مين اكتر عضو في مانووووس بتحبه ؟

* مش عايز حد يزعل منى
انا بحب كل الاعضاء

مين اكتر عضوة في مانوووس بتحبها؟
* روما وهانا منتانا دول اكتر بنتين بحبهم فى مانوس

ممكن تحب واحدة من النت و ترتبط بيها؟
* احب وارتبط كمان لا لا لا صعب
النت ده كله اشتغالات واحنا شاطريين اوى فى
الاشتغلات صح ؟

انت ترتيبك اية بين اخواتك؟
* انا اصغر واحد

لو انت الكبير اية دورك ؟
* عادى ماكنتش هعمل اى حاجه مختلفة يعنى

قولي جملة علي كل عضو:

* ياخى جمله ايه انا بحب احكى

محمود فتحي؟

* الواد ده راجل جدا وفعلا من الاصدقاء اللى انا بعزهم
فى مانوس وبعتبروا زى اخويا

ايهاب عادل؟
* هوبا حبيبى برضه وكمان واد كفائه
وعمره مانفضلى مش زى ناااس :@

فانتوم؟
* صباح الاشتغلات مع فانتوم والشات

محمد اونلي؟
* لسا معرفتوش اوى .. بس محترم جدا
وحبوب

دودي؟
* احنا معانا حد اسمه دودى
:p:p:p:p

اية اكتر اداري في مانوووس عامل مجهوود ؟
* بدون مجاملات انج اسلام

يالا بقي سلام
* سلام يا خويا وابقا تعالا كل يوم

هجيلك تاني

* مانا فاضيلك بقا ههههههههههههههه

******************************
نسينا نقول حاجه على دودى //
دودى من الناس الجامده جدا فى مانوس وكمان علطول معايا على اى حد بنت ولا ولد مابتفرقش مش زى ناااس المهم يعنى واد كفائه
******************************
ايه رايك فى بوئين التثبيت دول
ههههههههههههههههههههههههههههههههههههه
*** كل سنه وانتا طيب ***

اهلا ياحوده منور الكرسى والمنتدى كله

انا قولت اصبح عليك مش معقوله اعدى ولقيك عالكرسى ومسألش
ها جاهز متخفش مش هطول عليك 50 60سؤال كدا

1- امتى محمود حس انه ضعيف
2- وامتى حس بالفشل بغض النظرانه فاشل ومرحش الامتحان وبيضايق جدا من كلمه فاشل
3- بتحب امتى تبقى لوحدك
4- هل محمود
(عنيد--مغرور--عصبى--متكبر--ممل)ان شاء الله ميكونش فيك ولا صفه
5- حوده من النوع المشاغب..تاعب مامته وباباه واصحابه ولا من النوع المثالى
6- جرحت حد قبل كدا حبيته من غير متقصد وجرحت حد قبل كدا حبيته بقصد وياريت تقول الموقف
7- طبعا محمود مدلع لانه اخر العنقود .بتستغل دا فى تلبيه رغباتك
8- بتحب السفر والرحلات مع اصحابك ولا مع العيله
9- فى موقف حسيت انك مظلوم فيه وانت مش السبب ومش قادر تثبت كدا وتقول انك مظلوم
10- محمود انجرح قبل كدا من بنت وحاول يردلها القلم
11-يارتى حوده بيسامح الى غدربيه وياترى حد خانك قبل كدا واتأذيت من خيانته اووى
12- امتى بتحس انك فرحان اووى
13- ياترى محمود انسان كريم ولا لما يتزنق يخلع
14-لو هتبقى مشرف اى قسم تانى فالمنتدى تختار ايه
15- العضو المميز عندك
العضو المحترم عندك
العضو الرومانسى
العضو المثقف
العضو الى عاوز تصاحبه
العضو المقرب بالنسبه ليك
العضو الحبوب اووى
العضو الى مزهقك علطول
العضو النشيط
16- علاقتك بدينك ايه وهل بتحاول تقويها
17 امتى بتحس انك محترم اووى وامتى نفسك بتحتقرك
يارب يامحمود متكون مريت بمواقف كدا
وياريت مكنش طويلت عليك وتقبل تحياتى ومرورى
ومنور الكرسى يامان

ياحوده منور الكرسى والمنتدى كله

* ربنا يخليكى ده نورك والله

انا قولت اصبح عليك مش معقوله اعدى ولقيك عالكرسى ومسألش
ها جاهز متخفش مش هطول عليك 50 60سؤال كدا

* تنورى فى اى وقت يا قمر ..هو احنا نطول

1- امتى محمود حس انه ضعيف

* ولا مرة متهيالى

2- وامتى حس بالفشل بغض النظرانه فاشل ومرحش الامتحان وبيضايق جدا من كلمه فاشل

* هههههه ماشى ماشى
والله انا مابحسش بالفشل الا وانا قاعد فى الامتحان
والاقى كله بيحل وشغال الا انا :ٍS

3- بتحب امتى تبقى لوحدك

* لما ابقا مضايق من اى حاجه

4- هل محمود
(عنيد--مغرور--عصبى--متكبر--ممل)ان شاء الله ميكونش فيك ولا صفه

* ( عنيد + مغرور ) بس مش عصبى ولا متكير

5- حوده من النوع المشاغب..تاعب مامته وباباه واصحابه ولا من النوع المثالى

* مثالى جدا ههههههههههههههه
دانا مصر كلها بتشتكى منى

6- جرحت حد قبل كدا حبيته من غير متقصد وجرحت حد قبل كدا حبيته بقصد وياريت تقول الموقف

* يا سلام على الاسئله -- ايه السؤال العاطفى ده
دانا مش اقادر امسك نفسى دانا شويه وهعيط
ايه كميه الحب والجرح اللى انتى بتقوليها دى
انتى فاكرانى تامر حسنى
هههههههههههههههههههههههههههههههههههههه
مش عارف اجوابك اقولك ايه
انا لما بجرح حد لازم يكون بقصدى

7- طبعا محمود مدلع لانه اخر العنقود .بتستغل دا فى تلبيه رغباتك

* اكـــيد - بس برضه بينفضولى كتير

8- بتحب السفر والرحلات مع اصحابك ولا مع العيله

* يعنى حد يحب يروح مع العيله فى مكان

9- فى موقف حسيت انك مظلوم فيه وانت مش السبب ومش قادر تثبت كدا وتقول انك مظلوم

* ظلموووه لا لا لاااا ظلموه لا لا لااااااا
ههههههههههههههههههههههههههههه
ماحدش يقدر يظلمنى فى حاجه وعلطول بقدر اثبت
حتى لو كنت انا اللى غلطان

10- محمود انجرح قبل كدا من بنت وحاول يردلها القلم

* اه مره -- وكانت فضيحتها بجلاجل
هههههههههههههههههههههههههههه

11-يارتى حوده بيسامح الى غدربيه وياترى حد خانك قبل كدا واتأذيت من خيانته اووى

* اسامح مين .. مش بسامح حد انا ..دانا افضل اشتغلوا
طول حياتى

12- امتى بتحس انك فرحان اووى

* لما ابويا يدينى فلوس
- حد يحولى رصيد غلط
- وبرضه افرح اوى اوى
لو عاكست واحده حلوه وضحت
ياااااااااااااه
هههههههههههههههههههههههههههههههه

13- ياترى محمود انسان كريم ولا لما يتزنق يخلع

* والله على حسب بس غالبا بخلع

14-لو هتبقى مشرف اى قسم تانى فالمنتدى تختار ايه

* انا مشرف عام يا عسل صباح الخير

15- العضو المميز عندك

* انا المستحيله بذاتها

العضو المحترم عندك

* angle اكيد

العضو الرومانسى

* والله المنتدى ده كله بيموت فى الحب
اعتقد ان اغلبيه الاعضاء رومانسين بس برضه اقول
angle

العضو المثقف

* مانوس

العضو الى عاوز تصاحبه

* هيثووم بس هو اللى ناقص

العضو المقرب بالنسبه ليك

* محمود فتحى

العضو الحبوب اووى

* جوليان

العضو الى مزهقك علطول

* يااااااه لا مش عايزين حد يزعل
بس هما كتير اوى اوى

العضو النشيط

*انج اسلام

16- علاقتك بدينك ايه وهل بتحاول تقويها

* الحمد لله علاقتى حلوة ..
وفعلا بحاول اقويها

17 امتى بتحس انك محترم اووى

* طول عمرى محترم اوى

وامتى نفسك بتحتقرك

* لما بنفض لاى حد

يارب يامحمود متكون مريت بمواقف كدا
وياريت مكنش طويلت عليك وتقبل تحياتى ومرورى
ومنور الكرسى يامان

* تنورينا فى اى وقت
** ابقى تعالى كل يوم **
هههههههههههههههههههههههههههههه

سلام

ازيك ياحودة منور الكرسي والمنتدا والدنيا كلها

اية رئيك نسالك كام سؤال

ومتخفش مش هكتر عليك

يلا نبدا

لو خيروك تكون حد غير محمود مين هتختار؟
مين اقرب انسان لقلبك؟
اية اكتر شئ ممكن يضايقك ويعصبك؟
مين قدوتك في الحياة؟
اية اكتر شئ بيفرحك؟
اية اكتر اغنية بتحب تسمعها؟
اية هية امنيتك الي نفسك تحققها؟
اية الحلم الي حلمت بية وتحقق؟
مين هوة محمود من وجهة نظرك؟
اية الشئ الي مش بيعجبك في شخصيتك وتتمنى انك تغيرة؟
رتب هذة الكلمات علي حسب اهميتها لك:
الحب_المال_الصداقة_العائلة واية معنى كل كلمة من الحاجات دى من وجهة نظرك؟

كفاية كدة ياحودة علشان متقلش عليك
ويارب متكونشي اسئلتى ازعجتك
ولتانى مرة منور الكرسي بجد ياحودة

ازيك ياحودة منور الكرسي والمنتدا والدنيا كلها

* ربنا يخليكى يا قمر ده نورك

اية رئيك نسالك كام سؤال

ومتخفش مش هكتر عليك

يلا نبدا

* خدى رحتك اوى عادى عادى

لو خيروك تكون حد غير محمود مين هتختار؟

* انج اسلام ..يمكن

مين اقرب انسان لقلبك؟

* تصدقى مافيش حد قريب من قلبى
:S:S

اية اكتر شئ ممكن يضايقك ويعصبك؟

* ان حد ينفضلى .

مين قدوتك في الحياة؟

* ماليش قدوة فى الحياة عايش كده وخلاص

اية اكتر شئ بيفرحك؟

* مقلنا قبل كده
- حد يحولى رصيد غلط
- ابويا يدينى فلوس
- التالته شوفيها من فوق بقا
هههههههههههههههههههههههههههه

اية اكتر اغنية بتحب تسمعها؟

* تامر - انا مش عارف اتغير

اية هية امنيتك الي نفسك تحققها؟

* نفسى اطلع مهندس شاطر ومشهور اوى

اية الحلم الي حلمت بية وتحقق؟

* حلمت ان يكون ليا صحاب رجاله
والحمد لله تحقق

مين هوة محمود من وجهة نظرك؟

* محمود - واحد بسيط جدا حياته كلها النت والجامعه
بيعشق حاجه اسمها نغمات .. علطول بيهذر
مافيش اى حاجه بتزعلوا خالس مالس

اية الشئ الي مش بيعجبك في شخصيتك وتتمنى انك تغيرة؟

* ناس كتير بتقول عليا مغرور نفسى اشيل الموضوع ده

رتب هذة الكلمات علي حسب اهميتها لك:
الحب_المال_الصداقة_العائلة واية معنى كل كلمة من الحاجات دى من وجهة نظرك؟

* الصداقة --> يعنى ناس لما تحتاجها تلاقيها
- الحب --> الحب بالنسبالى حاجه من الاتنين لجواز لاشتغاله
-المال --> المال كل حاجه
-العائلة --> هيا اللى بتجيب المال
ههههههههههههههههههههههههههههههههه

مين اللي ع الكرسي ده حودة فون
والله منور يا عمنا
انا كنت معدية كده وقلت اشوف مين
هسألك شوية اسئلة كده ويارب مباقش تقيله عليك

مين اكتر حد قريب منك؟
هل لو حد غلط فيك بتسامحه ولا لا؟
مين اكتر انسان بتلجأ ليه لما تكون مدايق؟؟
امتي حسيت انك مخنوق اوي؟؟
ايه مفهوم الخيانة عندك؟؟ وياتري اتعرضت لموقف خيانة وياريت لو تقوله؟؟
ما معني الكلمات الاتية: الحب - الصداقة - الام - الاب - الخيانة؟
ايه الموقف اللي غير فيك صفة في طبعك؟؟
مين مثلك الأعلي؟؟
ايه طموحك في الحياة؟؟
ايه الحلم اللي حلمته واتحقق؟؟ وايه اللي لسه متحققش؟
حاليا انت بتشتغل ايه؟؟
وياتري مبسوط في شغلك؟؟
لو كنت مش مصري تحب تكون ايه؟؟
مش هقولك ايه مش عاجبك في مصر .. بس هقولك ايه اللي عاجبك في مصر؟؟
امتي بتدايق من نفسك اوي؟؟
مين اكتر حد حبيته في حياتك؟؟ ومين اكتر حد كرهته في حياتك؟؟
لو حد خانك هتعمل ايه وهتسامحه ولا لا؟؟
ياتري عامل كول تون؟؟ وايه هيا؟؟
ايه نغمة موبايلك؟؟ وياتري مخصص نغمات لمين؟؟
ايه اكتر اكلة بتحبها من ايد مامتك؟؟ وايه أكتر اكله مش بتبحها من مامتك؟؟ وبصراحة
بتعرف تطبخ؟؟ وايه اللي بتعرف تطبخه؟؟
ايه اكتر مشروب بتحبه؟؟ وايه اكتر مشروب بتكرهه؟؟

بس دي الاسئلة اللي جات في بالي دلوقت
هفكر وهاجي تاني اسألك ماهو انا لازم ازهقك شوية
باي يا احلي حودة
wae4

مين اللي ع الكرسي ده حودة فون
والله منور يا عمنا
انا كنت معدية كده وقلت اشوف مين
هسألك شوية اسئلة كده ويارب مباقش تقيله عليك

* تنورى يا قمر ياااااه روما ذات نفسها
دانا لسا مش مصدق

مين اكتر حد قريب منك؟

* 6 صحابى هما بجد اقرب ناس ليا وبحبهم جدا

هل لو حد غلط فيك بتسامحه ولا لا؟

* والله على حسب بقا .. ( الموقف والشخص وكده )
بس غالباا بسامح

مين اكتر انسان بتلجأ ليه لما تكون مدايق؟؟

* مافيش حد بلجأ ليه بحب اكون لوحدى وانا مضايق

امتي حسيت انك مخنوق اوي؟؟

* ماظنش ان انا كنت مخنوق
ولو مخنوق بنسى نفسى

ايه مفهوم الخيانة عندك؟؟

* الخيانه مثلا لما اكون بحب واحدة ومفهمانى
ان هيا مابتكلمش ولاد وافاجا بواحد قايلى انها بتكلم
فلان

وياتري اتعرضت لموقف خيانة وياريت لو تقوله؟؟

* فعلا تعرضت لموقف وانا فى الثانويه ان انا كنت بحب
واحدة جدا وعملتلها كل حاجه .وكان دى اول مرة احب بجد .. لغاية لما عرفت انها بتكلم واحد صاحبى ..
يووووه بقا ماتفكرنيش الله يحرقهم هما الاتنين
ههههههههههههههه

ما معني الكلمات الاتية: الحب - الصداقة - الام - الاب - الخيانة؟

* يوووه مانا لسا قايل فوق
ماتركزى شويه

الام + الاب
الحقيقة مش عارف اقول ايه

ايه الموقف اللي غير فيك صفة في طبعك؟؟

* مافيش حاجه تغير فى طبع حوده فوون

مين مثلك الأعلي؟؟

* ماليش مثل اعلى -- عايش كده ومن زمان

ايه طموحك في الحياة؟؟

* ابقا مهندس شاطر اوى فى دوله من دول الخليج

ايه الحلم اللي حلمته واتحقق؟؟

* ان يكون ليا اصحاب بجد وكتيير
اعتمد عليهم فى كل حاجه

وايه اللي لسه متحققش؟

* انى احب واحدة بجد مش اشتغاله

حاليا انت بتشتغل ايه؟؟

* انا حاليا طالب فى سنه تانيه كليه هندسة اتصالات
يعنى ممكن تقولى عاطل

وياتري مبسوط في شغلك؟؟

* على اساس ان شغلى الجامعة
انا بحب الجامعة اكتر من بيتى

لو كنت مش مصري تحب تكون ايه؟؟

* احب اكون ايطالى

مش هقولك ايه مش عاجبك في مصر .. بس هقولك ايه اللي عاجبك في مصر؟؟

* ايه اللى عاجبنى فى مصر
"" ان الناس كلها مكبرة دماغها لاى حاجه ""
البنزين غلى ..عادى - القانون الجديد .. اوكى
مابقاش فيه عيش .. مافيش مشاكل
ههههههههههههههههههههههه
قشطة على المصريين

امتي بتدايق من نفسك اوي؟؟

* يوم النتيجة

مين اكتر حد حبيته في حياتك؟؟

* امى وابويا

ومين اكتر حد كرهته في حياتك؟؟

* يااااااااه فى ناس كتير اوى بس انتى ماتعرفهمش خالص

لو حد خانك هتعمل ايه وهتسامحه ولا لا؟؟

* استحالة طبعا

ياتري عامل كول تون؟؟ وايه هيا؟؟

* بصى حوار الكول توون ده انا بطلت الشهر ده اعمله
لانى كنت بعمله ببلاش لان كان ليا صديق عزيز فى خدمة
العملاء .. وكان بيظبطنى فى كل حاجه
تصدقى نفسى اعمل كول تووون
ههههههههههههههههههههههههههههههههههه

ايه نغمة موبايلك؟؟ وياتري مخصص نغمات لمين؟؟

* انتى بتسالى حوده فوون على نغمة موبايله مع ان دى
اسرار دوله بس يالا
طيب هيا كانت تامر حسنى افتكرلى
وبقت حماقى - انا لو اذيتو
مخصص نغمات للناس كلهاااا
مش بقولك حوده فوون

ايه اكتر اكلة بتحبها من ايد مامتك؟؟ وايه أكتر اكله مش بتبحها من مامتك؟؟

* بحب جدا الحمام المحشى ويا سلام بقا لو مكرونة بالبشامل يااااااااااه ويا سلام بقا لو شويه رز كده بالمكسرات تبقا تمااااااام
كفايه كفايه هتجوعينى

* لا لا هى عارفة الاكل اللى انا مابحبوش ومابتعملوش
خالص

وبصراحة
بتعرف تطبخ؟؟ وايه اللي بتعرف تطبخه؟؟

* لا لا لا مع انى مفروض اكون بعرف اطبخ عشان
عايش لوحدى
بس لا لا لا ايه اللى يخلينى اطبخ والجاهز موجود

ايه اكتر مشروب بتحبه؟؟ وايه اكتر مشروب بتكرهه؟؟

* بحب عصير الليمون جدا
وطبعا البيبسى

* بكره بقاا عصير الجوافة بس

بس دي الاسئلة اللي جات في بالي دلوقت
هفكر وهاجي تاني اسألك ماهو انا لازم ازهقك شوية
باي يا احلي حودة

* تنورينى فى اى وقت انا مستنى اهوه
يالا
have a nice day

السلام عليكم و رحمة الله

ازيك يا حودة منور الكرسي يا معلم

انت وقع و لا الهوا اللى رماك

على العموم انا مش هطول عليك

بما انك حودة الشهير بحودة فون يالا نشوف تليفونك عامل ازاى

تليفونك نوعة اية؟

رنة موبايلك؟
و يا سلام بقى لو قلت رنة الجو؟

و رنة الرسالة و نغمة المنبة ؟

و كل الكلام دة و ايا سلام لو اسم البلتوث

و رصيدك كام بالمرة

اوعى تقول النمرة لاطردك sdrtaeQF

امنتيك اللى تفسك تحققها دلوقتى؟؟؟ انا بيتهيالى عارف ههههههههههه بس انت لسة بدرى عليك

الدراسة

شاكلك من الناس المتفوقة جدااااااااااااااا

طلعت بقى بكام مادة السنادى؟ رد فعل الحج اية؟

هههههههههههه بلاش احراج بلاش احراج

لو منتدانا اسمة مش مانوس كنت تسمية اية؟

رمضان قرب اهو ها هتصوم السنادى و لا زلا كل سنة؟

بتختم القران فى رمضان؟.؟؟

اوعدنى انك هتحاول السنادى ان شاء الله بقى

اميلك

كان واحد متسجل عندك؟

و يا ريت لو تعد عدد البنات الاون لاين دلوقتى

هههههههههههههههههههه مشكلتى انى عارفك

يالا كفاية عليك كدة يا جميل

اشوفك بعيدن

السلام عليكم و رحمة الله

* وعليكم السلام ورحمة الله

ازيك يا حودة منور الكرسي يا معلم

* الله يخليك يا اس ده نورك

انت وقع و لا الهوا اللى رماك

* لا الهوا هو اللى رمانى

على العموم انا مش هطول عليك

بما انك حودة الشهير بحودة فون يالا نشوف تليفونك عامل ازاى

* اكيد طبعا وافتخر بذلك

تليفونك نوعة اية؟

* N73 - ME

رنة موبايلك؟

* حماقى - انا لو اذيتو

و يا سلام بقى لو قلت رنة الجو؟

* تامر حسنى - قرب كمان
من اول وانا جنبك

و رنة الرسالة و نغمة المنبة ؟

* رنه الرساله - تراك اسمه
Nokiaexpre

المنبه
lio - kiss you
انا بموت فى الاغنية دى

و كل الكلام دة و ايا سلام لو اسم البلتوث

m7mod
وطبعا جنبه شويه جبشتكنات

و رصيدك كام بالمرة

* 7 جنية

اوعى تقول النمرة لاطردك

* حاضر

امنتيك اللى تفسك تحققها دلوقتى؟؟؟ انا بيتهيالى عارف ههههههههههه بس انت لسة بدرى عليك

الدراسة

شاكلك من الناس المتفوقة جدااااااااااااااا

طلعت بقى بكام مادة السنادى؟ رد فعل الحج اية؟

ههههههههههه بلاش احراج بلاش احراج

* اه مانا بقول كده برضه

لو منتدانا اسمة مش مانوس كنت تسمية اية؟

* ميوزك

رمضان قرب اهو ها هتصوم السنادى و لا زلا كل سنة؟

* لا انشاء الله ناوى اصوم
هههههههههههههههه

بتختم القران فى رمضان؟.؟؟

* مش دايما

اوعدنى انك هتحاول السنادى ان شاء الله بقى

* اوعدك يا سيدى

اميلك

* ماله

كان واحد متسجل عندك؟

* الهوت 147
* ياهو 72

و يا ريت لو تعد عدد البنات الاون لاين دلوقتى

* الهوت فيه 3 بنات اون لاين دلوقتى
* الياهو فيه 2 بس

هههههههههههههههههههه مشكلتى انى عارفك

* سكتم بكتم

يالا كفاية عليك كدة يا جميل

اشوفك بعيدن

* بقولك 5 اون لاين هو انا كنت فاضيلك دولقتى
عشان تيجى بعدين
ههههههههههههههههههههههههههه

سلام يا معلم ونورت

ازيك يا محمود

انا قريت ردودك كلها من الالف للياء

كلامى معاك هيبقى نظام دردشه كده

بس اوعدنى متزعلش منى دا لو كان فى كلامى حاجه تدايقك

انا شايفه انك عايش حياتك بالطول والعرض 00 انت مبسوط من كده ؟؟

وكمان فيك نموذج الواد الروش اللى ضارب الدنيا طناش ؟؟

تفتكر البنت بتحب النوع ده من الولاد ؟؟

من خلال كلامك 00انت دنجوان عصرك وزمانك

ايه احساسك وانت بتعاكس البنات ؟؟

وبتستفاد ايه لما تدايق واحده بمعاكستك دى ؟؟

ايه اكتر موقف محرج حصلك بسبب المعاكسات ؟؟

واكتر موقف مضحك برده ؟؟

ايه رايك فى علاقه الولد والبنت ؟؟ غير العلاقه الدراسيه طبعا

انت بتحب اغنيه انا مش عارف اتغير 00 تامر حسنى

انت شايف انى فيه حاجات فيك وفى حياتك عاوزه تتغير ؟؟

وايه اللى انت عايز تغيره ؟؟

عمرك اتدايقت من تصرفاتك؟؟

بتفكر فى ايه قبل متنام ؟؟؟

ولا بتعمل زى بقيت الشباب بتترمى على السرير وتنسى حتى تقلع الشوز بتاعك

بتشرب سجاير ؟؟

بتقضى يومك ازاى ؟؟

صيفت فين السنادى ؟؟

قولت كلمه " بحبك" كام مره على سبيل الاشتغاله زى مبتقول ؟؟

وكام مره قولتها من قلبك بجد ؟؟

اها نسيت اقولك حاجه 00 هو انت ليه بتقول على نفسك مغرور ؟؟

اقولك على حاجه لفتت انتباهى فيك

انك بتتكلم بطبيعتك اووووى ودى ميزه مش موجوده عند ناس كتير

ياريت مكونش تقلت عليك رغم انى عارفه ايه جواك من ناحيتى دلوقتى

See U Later

Bye

ازيك يا محمود

*الحمد لله كويس

انا قريت ردودك كلها من الالف للياء

كلامى معاك هيبقى نظام دردشه كده
* خدى رحتك اوى

بس اوعدنى متزعلش منى دا لو كان فى كلامى حاجه تدايقك

* متخافيش مش هزعل خالص

انا شايفه انك عايش حياتك بالطول والعرض 00 انت مبسوط من كده ؟؟

* اه جداا

وكمان فيك نموذج الواد الروش اللى ضارب الدنيا طناش ؟؟

* تقريبا

تفتكر البنت بتحب النوع ده من الولاد ؟؟

* ههههه ماعرفش بس تقريبا اه

من خلال كلامك 00انت دنجوان عصرك وزمانك

* احم احم

ايه احساسك وانت بتعاكس البنات ؟؟

* يااااااه ماقولكيش بقا
ههههههههههههههههههههههههه

وبتستفاد ايه لما تدايق واحده بمعاكستك دى ؟؟

* اهو يبقا بشتغلها وخلاص

ايه اكتر موقف محرج حصلك بسبب المعاكسات ؟؟

* هههههه
كنت بعاكس واحده تحت البيت
قالتلى " ماشى يا محمود والله لقايله لاختك بوسى "
بجد كنت محرج جدا
بس الحمد لله ماقلتش اى حاجه
ههههههههههههههههه

واكتر موقف مضحك برده ؟؟

* كنت فى الرحاب ..انا واتنين صحابى
وعاكسنا واحدة بس كانت ايه .. ماقولكيش بقا
وبعدين لفت وقلتلنا .. مش عيب عليكوا لما
تعاكسوا واحدة اكبر منكوا
ههههههههههههههههههههههههههههههههههههههه

ايه رايك فى علاقه الولد والبنت ؟؟ غير العلاقه الدراسيه طبعا

* حلوة حلوة ..بس انا مش بقتنع بيها
يعنى زى ماقلت قبل كده
ان غالبا بتكون الحكايه اشتغلات

انت بتحب اغنيه انا مش عارف اتغير 00 تامر حسنى

انت شايف انى فيه حاجات فيك وفى حياتك عاوزه تتغير ؟؟

* يااااااه كتير

وايه اللى انت عايز تغيره ؟؟
* تصدقى
مش عارف اقول ايه

عمرك اتدايقت من تصرفاتك؟؟

* مش كتير

بتفكر فى ايه قبل متنام ؟؟؟
* بفكر هصحا اعمل ايه

ولا بتعمل زى بقيت الشباب بتترمى على السرير وتنسى حتى تقلع الشوز بتاعك

* لا لا لا دانا منظم جدا واحب النظام فى كل حاجه

بتشرب سجاير ؟؟

* سؤال محرج انا كنت بشرب سجايركتير
بس دلوقتى اهو بقالى كتير الحمد لله
مافيش اى حاجه

بتقضى يومك ازاى ؟؟

* اغلبه نووم ونت ودايما خروجات فى الشارع

صيفت فين السنادى ؟؟

* لسا والله
بس انشاء الله قريبا
لمارينا او اسكندرية

قولت كلمه " بحبك" كام مره على سبيل الاشتغاله زى مبتقول ؟؟

* حوالى 5 مرات

وكام مره قولتها من قلبك بجد ؟؟

* مرة واحدة

اها نسيت اقولك حاجه 00 هو انت ليه بتقول على نفسك مغرور ؟؟

* مش عارف بس ناس كتير بتقولى انتا مغرور

اقولك على حاجه لفتت انتباهى فيك

انك بتتكلم بطبيعتك اووووى ودى ميزه مش موجوده عند ناس كتير

* شكرا شكرا

ياريت مكونش تقلت عليك رغم انى عارفه ايه جواك من ناحيتى دلوقتى

* ههههه لا والله
نورتى يا سوما

See U Later

* انتى كمان هتيجى تانى
هههههههههههه
مستنييكى

Bye

* باى يا قمر

حبيبي حوده هنا مش معقووول

والله منور الكرسي

انا متابع الاسئله والاجوبه بتاعك

عشان اضحك وبس

نيجي للجد بقا

مين من الاعضاء اللي سألوك من قبلي وتتمني انه يسالك تاني؟

ومين اللي انت مستني اسئلته ولسه مسالكش ؟

كام بنت حبتك بجد ؟

شايف ان انت شخصيه محبوبه ؟

هل انت جرئ ؟ مجنون ؟ هادي ؟

ايه اكتر مقلب مضحك اتعمل فيك ؟

انت بتقول انك شايف ان فيه حاجات كتير اتغيرت فيك

ايه السبب وراء تغيير حوده فون؟

كفايه صفه واحده بس اتغيرت فيك وايه سببها

نفسك لما تخلص كليه تسافر ؟

ولو عاوز تسافر هتسافر فين وليه ؟

بس كده كفايه عليك كده يا حبي

اه صح استني

بتقول هتصيف يا في اسكندريه يا في ايه

يا حبيب قلبي

هتخدعني بعد كل ده

REY3W

اوعي تعشمني بيك وتغدر بيا

حبيبي حوده هنا مش معقووول

* لا صدق دى حقيقة

والله منور الكرسي

* ربنا يخليك

انا متابع الاسئله والاجوبه بتاعك

عشان اضحك وبس

* يعنى متابع ومستنى ده كله

نيجي للجد بقا

مين من الاعضاء اللي سألوك من قبلي وتتمني انه يسالك تاني؟

* بجد اتمنى
روما وسومة يسالونى تانى

ومين اللي انت مستني اسئلته ولسه مسالكش ؟

* لا انا مستنى باقى المنتدى بقا

كام بنت حبتك بجد ؟

* كتير

شايف ان انت شخصيه محبوبه ؟

* جدا .. ولا انتا شايف غير كده

هل انت جرئ ؟ مجنون ؟ هادي ؟

* الحمد لله " جرىء ومجنون "
لكن مش هادى خالص

ايه اكتر مقلب مضحك اتعمل فيك ؟

* يااه فى كتير اقولك ** كان من واحدة صحبتى
من الجامعة
فضلت حوالى شهرين تكلمنى على الموبايل
على اساس حب بقا وبتاع
وقالتلى هقابلك فى سيتى ستارز
وكانت جايبة الشله كلهاا
كانت فضيحة والله
ههههههههههههههههههههههههههههههه

انت بتقول انك شايف ان فيه حاجات كتير اتغيرت فيك

ايه السبب وراء تغيير حوده فون؟

كفايه صفه واحده بس اتغيرت فيك وايه سببها

* ههههههههههه
مش عارف بقا
مش هقولك انسانه حبتنى والاشتغالات دى
هههههههههه مانتا عارف اللى فيها
هههههههههههههههههههههه

نفسك لما تخلص كليه تسافر ؟

* ياه دانا بحلم بكده

ولو عاوز تسافر هتسافر فين وليه ؟

* نفسى اسافر اى بلد اجنبيه اوى

بس كده كفايه عليك كده يا حبي

اه صح استني

بتقول هتصيف يا في اسكندريه يا في ايه

يا حبيب قلبي

هتخدعني بعد كل ده

* عيب عليك
دانا عايز اجى اسكندرية مخصوص عشانك

* شكر على الاسئلة
ونورت الكرسى

» مسابقة " بنوتة مانوس المميزه "
» برنامج " موبايلك معانا " ::: Only_you:::
» مســابقة الشعر " شارك معانا "
» كلمات اغنيه ازاى ضيعتك من حضنى """"(رامى صبرى)""""
» وحيد سيف بيهزق شعبان عبد الرحيم """" فيديو """"