كابوس فاشل جدا!!
المشهد الاول- كابوسرقم 1 :
نهار داخلي .. حجرةاحد الطلبة الفاشلين .. ليلة الامتحان .. قبل الفجر : فاكر ان لسة بدري على الامتحان .. وطبعا لسة مذكرتش حاجة ولا فتحت كتاب .. وفجأة القى في روعي ( وما تقولش يعني ايه روعي ؟ ) ان فاضل كام ساعة على الامتحان .. يا نهار اسود .. مرة واحدة كده ؟؟ ده انا لسة ماذاكرتش .. حاولت اقرأ اي حاجة بسرعة .. بس القراية بطيئة . والكلام كتيييييييييييييييييير .. والوقت بيجري بسرعة .. وانا بنهج .. ونفسي بيروح .. وعايز اصرخ .. اصرخ .. لأ اااااااااااااه ه ( كات )
اصحا من النوم مفزوعا لأجد ان الامتحان لسة مجاش !!
المشهد الثاني – كابوس رقم 2 :
برضه نهار بس خارجي المرة دي .. راكب المشروع والسواق راجل عجوز .. دايس على البنزين بطرطوف صوبع رجله الصغير وعمال يكحكح وشكله بيموت اساسا .. عداد السرعة بيقرا 3 امتار في الساعة .. وانا بصرخ يا عم : اسرع ابوس رجلك فاضل خمس دقايق على الامتحان .. الوقت بيجري .. انزل من المشروع واقعد اجري في الشارع .. لجري .. لكن رجلي ما بتجريش .. والاسفلت بيتحول لرملة .. ورجلي بتغرز في الرملة وبنهج .. بنهج .. ونفسي بيروح .. وبصرخ .. بصرخ .. لآاااااااااااااااااااااااااه ه ...... ( كات )
اصحا من النوم مفجوعا لأجد ان برضه الامتحان لسة ما جاش
المشهد التالت – كابوس 3 :
نهار داخلي .. نفس الحجرة بتاعت كابوس رقم 1 .. نايم على السرير غارق في نوم عميق .. وفجأة يرن جرس المنبه .. اصحو مفزوعا على صوته المزعج .. انظر في الساعة يا نهار اسود الساعة 12 .. ده انا امتحاني الساعة 9 .. انا كده الامتحان فاتني .. انا سقطت .. صدري بيضيق .. نفسي بيروح .. عايز اصرخ .. اصرخ .. لأ ااااااااااااااااااااااااااااه ه ( كات ) زي كل مرة طلعت فطشة
المشهد الرابع – كابوس رقم 4 :
نهار خارجي .. بجري جوه كليتي عشان الحق الامتحان لكن المرة دي كنت عارف ميعاد الامتحان .. ومارحتش عليا نومة .. ولا اتاخرت على الامتحان .. كل حاجة المرة دي ماشية مظبوط .
وصلت الى اللجنة في هدوء .. تركت حاجتي على الباب واقتربت منها ولسة هدخل لقيت المراقب بيقولي : رايح فين يا كابتن ؟؟
- هي مش دي كلية تجارة ؟؟
- - ايوة
- - امتحان المحاسبة سنة تالتة
- - تمام ..
- - طيب عايز ادخل
- - لا .. تدخل فين ؟؟ .. (( ثم يبتسم ابتسامة صفراء )) ثم يقول : مفيش مكان
- - مفيش ايه ؟؟؟؟؟؟؟!!!!
- - ايه الجنان ده ؟؟ .. هو انا بركب مشروع عشان تقولي مفيش مكان
- - يا عم ده انا معايا رقم جلوس
- - والله لو معاك بسبور .. برضو مافيش مكان
- - طب اروح دلوقتي ولا اعمل ايه
- - اطلع على مبنى العميد يمكن تلاقيلك مكان هناك
اخذتها جري وطلعت على مبنى العميد .. لقيت امة لا اله الا الله واقفة
- ايه يا جدعان .. هو ايه النظام ؟؟
- - والله مستنين
- - مستنين ايه بالظبط ؟؟
- مستنين اي حد يخلص عشان حد يخس مكانه
- - ايه يا جدعان .. هيه ميضة ؟؟ .. ده امتحان .. يعني ممكن محدش يخرج الافي اخر الوقت
- - والله ادينا مستنين .. ادعي بس انت ربنا يسهل للي جوه ..
واخذ الجميع يهتف في صوت واحد .. يا لطيف .. يا لطيف .. وبعد كتير من الدعاء والابتهالات مثل يا مسهل سهلها .. وانتعهم بالسلامة يا رب .. وبعد مرور معظم الوقت .. ربنا سهل لواحد ودخلت انا مكانه .. كتبت اسمي على الورقة الاجابة ورقم جلوسي ولسة حقول يا هادي لقيت اللي يقولي (( ضع القلم )) .. بيني وبينكم انا كنت عايز اضع القلم في عينه .. لكن استخسرت القلم .. قعدت انهج .. ونفسي يروح .. واصرخ .. واصرخ لا اااااااااه ه .. لكن محدش قال : ( كات ) .. ولا صحيت من النوم .. ذلك لأنه كان بالفعل كابوس حقيقي .
