تخيل نفسك رئيس الجمهوريه

تخيّل إنك رئيس الدولة

تعالى نتخيل
يا عم انت حتدفع حاجة من جيبك ؟
الحلم ده على حسابي
غمض عيمشكووووووووور شوية واحلم انك بقيت رئيس البلاد
متقولش ازاي؟.. مش مهم
زورت الانتخابات.. او قلت للناس انتخبوني احسن ارمي نفسي من فوق البرج فصعبت عليهم قاموا انتخبوك.. او يكون لك واحد صاحبك امريكاوي بتكلمه على الياهوو وقال لبوش انك ولد مجدع ورجولة وكفاءة وانك من بتوع العولمة والعوالم والنظام العالمي الجديد لنج.. ومش من اللي بيصلوا الفجر جماعة.. فوافق بوش انك تقعد على... الكرسي
المهم انك بقيت دلوقتي رئيس البلاد
*********
مين قدك يا عم؟
حتاكل طعمية مقلية بزيت فرنساوي وربنا ح يتوب عليك من طعمية ابو هويدا المقليّة بزيت العربيات
وحتتعالج من انيميا الفول.. الفول الجديد بقه يا عم من غير سوس
وابقي قابلني لو لقيت اي مسمار في العيش.. حتاكل عيش من ابو الرغيف بربع جنيه.. سخن وطازة وطري.. تخيل.. طري مش زي العيش اللي انت كنت بتاكله وانت بتشرب كوباية ميه ورا كل لقمة علشان تنزل
لا لا.. العيش ابو شلن ده اللي انت كنت بتجيبه من الفرن وعقبال متوصل بيه البيت يسلجم ويقفع ويعرقص.. وتعاقب عليه دولياً لأنه اصبح من اسلحة الدمار الشامل.. لا انسى الكلام ده
الاوضاع حتتغير خالص ياعم.. دا انت ربنا حيكرمك خالص والله العظيم
طب بص دي.. حتاكل لحمة.. متبرّقش أوي كده.. مش عارف يعني ايه لحمة؟
( همّ حيقولولك )
وبعدين انت مش كنت بتسمع وانت قاعد على القهوة وحاطط رجل على رجل وصباعك طالع من الجزمة انهم حيستوردوا حاجة كده من السودان واثيوبيا
آه فاكر ؟
أهي هي دي اللحمة
لا لا مش اللي انت كنت بتاكلها في العيد ، بتاعت العيد دي اسمها كرشة.. متفضحناش بقه الله يسترك
*********
وحيبقى فيه كنكاكي.. متسألش.. دي فراخ.. يعني حتودع عم لطفي الفرارجي اللي كان بيعين لك رجلين الفراخ وانت كنت بتقول له عشان الكلب.. وكان ساعات يفوّتلك حتتين قنصة على حتتين كبدة من بتوع الزباين اللي بيستحموا بصابون اجنبي
وحتشرب السيجارة كلها مرة واحدة.. يعني مفيش تخميس
وبعدين دي سجاير ستراكي سترايك من بتاعت الست ماري منيب.. جو تاني
بس لما يخدوك علشان تحلف اليمين
ياعم دا غير يمين الطلاق اللي انت مصدره في كل حدوتة تحكيها
اصحي معايا الله ينجيك
لما تروح تحلف اليمين اوعى تروح بالبدلة بتاعت جوازك.. انت عارف.. دي بقت مكيفة الهواء من كل ناحية.. العربي جوز ام بطة عنده بدلة اخوه باعتهاله من بلاد بره ابقى استلفها منه وإقضي مصلحتك وبعدين رجعهاله.. ماهي الجيران لبعضها امال ايه
وحياتك كمان يا شيخ متروح بالجزمة بتاعتك.. عشان خاطري ابقى اشتريلك جوز جزمة من بيع المصنوعات دي رخيصة هناك.. لأن الحدوة اللي انت مركّبها في كعب الجزمة بتعمل صوت قلق برضه.. وبعدين ممكن الجهاز يصفر عليك تبقى حكاية.. فاهم ؟
اول يوم بس وبعدين همّا بعد كده حيتصرّفولك في جوزين جزم مستوردين عشان تقابل بيهم اصحابك بتوع الدول التانية
*********
وحتنام على سرير عليه مراتب.. المراتب دي بقه جواها قطن
ايوة قطن.. والله العظيم قطن.. ايوه تمام زي القطن اللي انت جبته من الاجزخانة للوله حودة ابنك لما الواد شحته ابن ام بيسة لزقه بالطوبة في نافوخه فتحهاله
وجريت بيه على المستشفى قالولك هات لنا قطن وشاش وميكروكروم وصبغة يود وبلاستر وسرنجة وحقنة تيتانوس وكيس دم واقطع تذكرة بخمسة جنيه من شباك العلاج المجاني
ايوه هو ده القطن.. فهمت ؟
حتحلم احلام نضيفة على السرير دا يا عم الحاج
افرد طولك.. متخافش رجليك مش حتطلع برة الاوضة.. انت مش في بيتكم دلوقتي.. افرد افرد
غمّض عيمشكووووووووور كده
غمّض
*********
ايه؟.. انت نمت ؟
اصحى يا عم.. اصحى.. الباب بيخبط
الحق.. موظفين الكهربا على الباب
الحق دول جايين يشيلوا العداد علشان بقالك 3 شهور مدفعتش الفاتورة

هههههههههههههههههههههة بجد التوبيك هايل يا حوده

وانا لو بقيت رئيسه جمهوريه
انا هبقى زى هانى رمزى فى فيلم ظاظا مش هعمل فرق مابينى وما بين المواطنين ده انا هيبقى نمرة موبايلى مع كل الناس وانا عارفه هموت فى الاخر

ههههههههههههههههههههههههههههههههههههههههههههههههههههههه

انا لو بقيت رئيسه جمهوريه هعتقل العيال اصحابى واحبسهم حبس مؤبد

خلى البلد تنضف شويه منهم هههههههههههههههههههههههههههههههه

بجد مش عارفه ممكن اعمل ايه بس الاكيد انى فى حاجات كتير لازم تتغير

نايس توبيك يا محمود تميز كالعاده

» شايف نفسك سريع في الكتابه ؟؟ خش اختبر نفسك وقلنا النتيجه
» بتكلم نفسك ؟؟؟ طيب تعال أعرف ازاي تكلم نفسك
» تخيل العالم من غير رجالة
» تخيل امك و ابوك هنا ........في المنتدى
» لو قابلت رئيس الجمهورية..!؟