حبيبتى بنتى ياللى جوازك فرحنى فرحة متتنسيش
اليوم زفافك لبيت عريس عن جو طبعه متعرفيش
وعشان يحبك وتكونى زوجته وغالية عنده مترخصيش
حاأقول نصيحة لوعشت بيها فى ضل جوزك متتعبيش
عشان يا بنتى من غير متاعب فى بيت راجلنا عاوزين نعيش
****
خليكى دايما وياه قنوعة وكونى راضية ماتطمعيش
وشىء مايقدر عليه بلاش وأى مرهق ما تطلبيش
وقولى دايما نعم وحاضروفى المطالب ما ترفضيش
وفى كل ساعة أوامره طاعة والكدب خيبة ما تكدبيش
عشان يا بنتى من غير متاعب فى بيت راجلنا عاوزين نعيش
****
وتكونى دايما أجمل جميلة وفى المراية ما تهمليش
وإن شوفتى شكلك ماكنش رايق قدام عيونه ما تظهريش
وتخلى ريحتك ريحة جناين والريحة عندك ما تكسليش
وإزوقيله وإتعطريله مادام لزوجك ما يهمكيش
عشان يا بنتى من غير متاعب فى بيت راجلنا عاوزين نعيش
****
والأكل دايما تجهزيله وعن معاده متأخريش
لحسن يا بنتى الجوع ده مؤلم والبطن تطلب ما تستحيش
وإن نام شوية يرتحله ساعة فى وقت نومه ما تهيصيش
مش هو شقيان عشانك وفى وقت نومه ما تريحيش
حرام يا بنتى بلاش متاعب فى بيت راجلنا عاوزين نعيش
****
والبيت تحافظ عليه عينيكى وفى كتر ماله ما تبعزقيش
وإن جبتى منه عيال راعيهم وعلميهم ما تجهليش
دا سره إوعى تقوليه لأبوكى عشان فى عينه ما تصغريش
وبره بيته لداعى تافه من قبل إذنه ما تخرجيش
عشان يا بنتى من غير متاعب فى بيت راجلنا عاوزين نعيش
****
وإن شفتى جوزك زعلان شوية فى وقت همه ما تفرحيش
وإن كان مفرفش وجوه رايق فى صفو جوه ماتعكريش
بادليه تملى ظروف حياته وكونى منه ماتفرقيش
وبين حماتك وأخت جوزك تكون محبة ما تكرهيش
عشان يابنتى من غير متاعب فى بيت راجلنا عاوزين نعيش
****
وإن حد قالك كلام فى حقه من غير عينيكى ماتصدقيش
وإن غيرتى غيرى عليه براحة مش غيرة نارها ماتنطفيش
والله يباركلك فى جوازك وتيجى زايرة ماتغضبيش
ولو مشيتى فى نور كلامى حانعيش وطبعا فراق مافيش
وأنا تحت أمرك وأقول معاكى فى بيت راجلنا عاوزين نعيش
منقووووووووووووووووووووووول
سلـــــــــــــــــــــــــــــــــــــــــــــــــمى
