ازاي تصبغي شعرك....................????????????????????????

المرحلة الثالثة
اختبار الصبغة

ساعات بتختاري لون معين من الكتالوج بتاع الصبغة ولما تيجي تعملي اللون ده تلاقيه مش مناسب أو تلاقي إن الدرجة دي مش هي نفس الدرجة اللي أنت عايزها...

وعلشان تتفادي المشكلة دي ياريت تجربي تصبغي خصلة واحدة من شعرك وبعد كده شوفي إذا كان اللون ده هو اللون المطلوب ولا لأ.

المرحلة الرابعة
تجهيز أدوات الصبغة



بعد ما اخترتِ اللون المناسب هتبدئي تجهزي أدوات الصبغة وكل اللي هتحتاجيه:

1- علبة الصبغة باللون المناسب.

2- جوانتي بلاستيك علشان تحمي إيدك وأظافرك من التلون بلون الصبغة.

3-علبة فازلين ودي علشان تدهني بها حدود وشك وتدهني رقبتك كمان وده لحمايتهما من لون الصبغة.

4-ملابس قديمة علشان تلبسيها وأنت بتصبغي شعرك واوعي تنسي الفوطة الكبيرة علشان تحطيها على كتفك.

5-مشط بأسنان رفيعة.

6- مساكات للشعر.

7-فرشاة الصبغ.
المرحلة الخامسة
ازاي تستخدمي الصبغة على شعرك




دلوقت بقى يا قمر أهم مرحلة وهي إنك تبتدي تصبغي شعرك ..

تعالي نشوف ازاي...

1- حضري الصبغة زي ما بيكون مكتوب على العلبة بتاعتها من بره أو في النشرة الداخلية ليها.

2- قسمي شعرك إلى أربع مناطق من الأسفل إلى الأعلى وامسكي كل جزء بمساكات الشعر.

3- هات فرشاة الصبغة وحطيها في الصبغة وبعد كده ابدئي في توزيع الصبغة على شعرك من بداية نمو الشعر وياريت تبدئي بخصلات شعرك الخلفية.

4- بعد ما تدهني خصلة شعرك كويس بالصبغة هات المشط ومشطي الخصلة دي وبعد كده لميها بمساكات الشعر وكملي باقي شعرك بعد الانتهاء من الخلف اتجهي إلى المناطق اللي على جنب وبعد كده اتجهي إلى الأمام.

5- لو كان شعرك أبيض وعايزة تصبغيه باللون الأسود يبقى ابدئي من مكان وجود اللون الأبيض وعادة ما يكون من الأمام إلى الخلف.

6- خدي بالك وأنت بتوزعي الصبغة على شعرك إنك تحطي كمية كافية لكل شعرة وتصبغيه جزء بعد جزء ويكون التوزيع مساوي جدا وإلا شعرك هيطلع فيه أكثر من درجة من نفس اللون ومش هيكون كله لونه واحد.

7- بعد انتهاء الوقت المطلوب اللي بيكون مكتوب على العلبة بتاعة الصبغة اغسلي شعرك بمياه فاترة كويس أكثر من مرة لغاية ما تزول الصبغة من على شعرك وبعد كده اغسلي شعرك بالبلسم المخصوص للعناية بالشعر المصبوغ اللي عادة بيكون موجود في علبة الصبغة نفسها سيبي البلسم على شعرك لمدة خمس دقائق وبعد كده اشطفي شعرك بالمياه الفاترة وبعد كده الباردة.

8- خدي بالك إنك مش هتقدري تحكمي على لون الصبغة إلا بعد ما شعرك ينشف.

بس يا ستي دي كانت أحسن الطرق لصبغ الشعر
وتعالي نشوف إيه اللي لسه معانا تاني النهاردة




علشان أكون عملت كل اللي عليّ دي شوية نصائح تاخدي بالك منها ...




يلا نشوف النصائح دي مع بعض
1- لو احترتِ في اختيار درجة لون الصبغة "الفاتحة ولا الغامقة" يبقى اختاري الفاتحة لأنها لو طلعت مش مضبوطة أو مش حلوة عليك هتقدري تغيريها بسهولة بإنك تغمقي لون شعرك وده طبعا على عكس الصبغة الغامقة هيبقى من الصعب تفتحيها.
2- ياريت تختاري نوع كويس من الأنواع معروفة المصدر وابعدي نهائيا عن الأنواع المجهولة لأنها بتضر الشعر جدا.
3- احذري من إن الصبغة تيجي جنب عينك ولو حصل يبقى اغسلي عينيك كويس بالميه.
4- لو الصبغة جت على بشرتك غصبا عنك وأنت بتصبغي يبقى شيليها بسرعة قبل ما اللون يثبت.. ولو اللون ده ترك أثر على بشرتك يبقى امسحي المنطقة دي بقطنة مبللة بمزيل المانيكير وبعد كده اغسليها كويس بالميه.

5- اوعي تستخدمي الصبغة وأنت لسه عاملة حنة لشعرك لأن بكده لون الصبغة مش هيكون واضح.
6- بلاش تصبغي شعرك باستمرار علشان ما يتعبش من كتر الصبغة ومن الأحسن إنك تصبغيه مرة كل 6 أشهر.
7- خدي بالك كويس قوووي إن شعرك وهو مصبوغ بيكون محتاج لعناية من نوع خاص علشان لون الصبغة ما يبهتش علشان كده ياريت تهتمي بشعرك باستمرار وهو مصبوغ بإنك تستخدمي الشامبو والبلسم المخصص للشعر المصبوغ وإنك تعملي لشعرك حمام كريم كل أسبوع..
8- من الأفضل عدم تعرض الشعر المصبوغ لماء "حمام السباحة" أو "ماء البحر" لأن ده يؤذي الشعر المصبوغ ولو مضطرة تتعرضي ليهم يبقى ياريت تستعملي كريمات الوقاية الخاصة بالشعر المصبوغ قبل التعرض لهذه المياه.
9- لو كنتِ هتعملي حمام بخار وأنت صبغة شعرك يبقى ياريت تحطي على شعرك فوطة ناشفة علشان تحمي شعرك من الرطوبة اللي ممكن تضر شعرك وتخلي لونه باهت.

10- لو كنت بتعاني من مشكلة تساقط الشعر أو فروة راسك فيها أي حبوب يبقى بلاش تستخدمي الصبغة نهائيا إلا بعد ما شعرك يشفى تماما.