فستان زفاف أسود

فستان زفاف أسود
---------------
لما جم يفرحوكى
لبسوكى توب زفاف
لونه أسود
وطرحه غطت كل وشك
غمو عينك متشوفيش
العريس اللى جاى
أصله وريث
والفرح بدل الفرح
كان صوان للعزا
وبانت ملامح الفرح
معازيم من غير عشا
أزاى يفرحوا
لما عرفوا أن العريس
من غير رضاها
أصله ده مفروض عليها
بالوراثه
تقلت همومهم بهمها
مكتوب عليكى متفرحيش
هما فاقوا من هموم اللى قبله
لما ييجى اللى خانوا
واللى باعوكى بالرخيص
يخطبوكى للوريث
العيون بالدمع سالت
والقلوب بالحسره مالت
لما عرفوا العريس
اللى جالك ده وريث
قالوا آه طبلت فوق رؤسنا
هو أحنا كان ناقصنا
هب وكتر الكلام
الفرح قلب بغم
والموسيقى بقت حزينى
والكهارب ضلمت
الجوازه بقت جنازه
والكلام مبقاش كلام
والتهانى بقت تعازى
وأنت صامته مبلمه
مابتتكلميش أتكلمى
فاكرة هوجه عرابى
فاكرة ناصر
لما خرج الأنجليز
فاكرة تأميم القناه
ولا حرب بورسعيد
فاكره كامل ويا سعد
فاكره مكرم فاكره حرب
فاكره دول كل واحد من ولادك
شال ريشه من جناحك
علشان تطيرى ويطيرك
أيوه كانوا بيطيروكى
فوق فى السما عالى
أرفعى راسك لفوق
القدر ع الرقبه طوق
مفهوش مفر
بكره برده ييجى واحد
من ولادك زى القدر
يشيل مشاعل نور
تنور طريقك وتنورى الدنيا
لكل البشر
وتقلعى توب الحزن
وتلبسى توب القدر
وتعود أبتسامتك
الجميله يا كحيله
ويجرى نيلك من الجنوب
للشمال للقنال يروى البشر
وتعودى تانى يا مصر
تلبسى توب الزفاف
أبيض لون الفرح