جالك عريس

سلام عليكم
هدخل طواااالى
فى موضوع شاغل
بال البنات
وانا سميته
حوار الساعة
كل يوم شكل وخناق فى البيت
عريس جايلك تعالى شوفيه
فى كل بيت تقريبا
ودة حوار كل يوم

يفتح الستار على موال كل يوم

البنت راجعة من الشغل لقيت مامتها فى اوضتها بتتفرج على التليفزيزن و متنكدة

البنت : انا جيت يا مامتى ، ايه مالك مين زعلك ؟؟

ماما : محدش زعلنى ، بنت خالتك خطوبتها الاسبوع الجاى

البنت : الف مبروك و الله هاروح بقى اكلمها اباركلها ، بس هى دى حاجة تزعلك

ماما : بنت خالتك اصغر منك ب 6 سنين و خلاص هاتتجوز

البنت: طيب يا ماما و ماله كل شىء قسمة و نصيب ، و انا لما هايجيلى نصيبى هاتجوز

ماما : يا بنتى نفسى اشوف ولادك قبل ما اموت

البنت: يا دى النيلة يا ماما بعد الشر عليكى و بعدين هو انا كل يوم لازم اسمع نفس الموشح

ماما : كلامى مش عاجبك واقف فى زورك ، يا بنتى العمر بيجرى ، و انا مش هاعيش قد ماعشت ، عايزة اطمن عليكى

البنت : يا ماما مش يمكن اموت انا الاول و بعدين لو ربنا رايد انى اتجوز هاتجوز

ماما : يا بنتى الملافظ سعد بعد الشر عليكى ربنا يجعل يومى قبل يومك ، بس اخرجى شوفى الناس ، اتفسحى ، خلى الناس تشوفك فى الشارع

البنت: يعنى امشى احط يافطة مطلوب عريس ؟؟ انتى عارفة انى مابحبش جواز الصالونات و ساعات بوافق اشوف اى عريس علشانك

ماما : مهو طول ما انتى قاعدة بوزى فى بوزك او قاعدالى على المخروب اللى اسمه النت مش هاتتجوزى
البنت: استغفر الله العظيم مال النت و مال الجواز

ماما : صحابك كلهم اتجوزوا ووولادهم بقوا فى حضانة و ابتدائى ، يعنى بذمتك انتى مش احلى من عبير ام ضب ، و لا هناء اللى دمها زى السم

البنت : يا ماما القرد فى عين امه غزال انتى علشان ماما شايفانى حلوة ، و بعدين لما يجيلى عريس كويس هاوافق علطول

ماما : طيب ايه اللى ماعجبكيش فى الدكتور مجدى ؟؟؟؟؟؟؟؟

البنت : دكتور مجدى مين ؟

ماما : الدكتور اللى جالك و انتى فى 3 ثانوى

البنت : يا خرابى يا ماما انتى لسة فاكرة دة الموضوع دة عدى عليه زمن يكاد يكون قرن و انا كنت صغيرة و كان عندى 17 سنة و هو عنده 33 سنة

ماما : اه صحيح دة من زمان و انا كمان حتى رفضته ، طيب ليه ما اتجوزتيش ياسر ؟؟

البنت : يا ماما انتى بتكلمينى عن حاجات حصلت ايام الجامعة ليه ؟؟
البنت : انسى بقى و اقفلى على الموضوع دة

ماما : طيب يا بنتى اخرجى علشان خاطرى الناس بتتجوز كدة

البنت : يا ماما ارحمينى انا زهقت بقى من السيرة دى ما انا بخرج بس مش معقول هاخرج كل يوم ، انا بحب البيت اكتر و بزهق من الخروج

ماما : طيب روحى عند سالى

البنت :
يا ستى كنت عندها من اسبوع هى صورة و بعدين البنت متجوزة عايزة تكون
براحتها فى بيتها و مش معقول كل ما اروحلها تتصلى بيها تقوليلها ، لو بنتى
رجعت من غير عريس هازعل منك ، هو حد قالك انها خاطبة

ماما : انتى خلاص مابقيتيش عايزة تسمعى منى كلمة ، طيب اخوكى عايز يتجوز

البنت :
طيب و انا مالى ، مايتجوز انا دخلى ايه ؟ و بعدين يا ماما دة اصغر منى
بسنة و يا دوب مرتبه مكفيه و شقته فى مكان مهجور ، و اصلا هو مش مرتبط و
لا فيه واحدة فى دماغه مين اللى قالك انه عايز يتجوز ؟؟

ماما : محدش بس انا عرفتها لوحدى ، انا يا ضنايا حاسة بيه و عارفة

البنت : لا حول ولا قوة إلا بالله طيب انا مليت بجد من الكلام دة و عصبت انا هانزل هاروح عند عبير عايزة حاجة اجيبها و انا جاية ؟

ماما : هاتى عريس و انتى جاية

و ينزل الستار و البنت بتشد فى شعرها و بتفكر تنتحر
بصراحة كدة عايزين الاهل تخف شوية من
الموضوع دة هتتجوزى امتى عايزين نشوف عيالك
المسالة مش غصب ولا اجبار
وتجارب كتير فشلت كان اساسها الاجبار
نخلى فيه مساحة من الحرية فى الاختيار
اظن دى اقل حاجة نطلبها
الجواز مسؤلية
ولازم نكون ادها
مش عايزين نشمت فينا الاجانب
وانا رايى ان الحكاية عايزة صبر
منتسرعش على الجواز زى ما بشوف كدة
اصبر تنول زى ما بيقولوا
عايزة اعرف منكم رايكم فى كلامى دة
ولو حد عندة تجارب حصلت يحكيلنا
بس بردو عايزين عرسان

صح يا بنات

سلاااام بقى

والله الكلام ده صحيح وموجود فعلا
لان اى ام نفسها تشوف اليوم اللى بنتها تبقي متجوزة
وانها مطمنه عليها باى طريقه بقي
سواء صالونات او غيره

انا محصلش معايا الموقف لانى لسه صغيره برضو على فكرة الجواز دى
بس دى حاجة مفروغ منها وبتحصل من امهات كتير
واى بنت المفروض تتقبل الموضوع من امها مع انه بيبقي رخم شويه
بس مبقاش فى النوع ده دلوقتى بقت مساله حريه واختيار اكتر

سورى ع الاطاله
ثانكس على التوبيك

ولا يهمك
انا مبسوط ان اول رد كان لبنت
وميرسى اوى على ردك نورتى التوبيك

هههههههههههههه والله انا لحد دلوقتي ربنا راحمني و ربنا يستر كمان سنتين و لا تلاته ههههههههههه

موضوع جميل جداااااااااااااااااااا وفعلا دا بيحصل

ههههههههههههههههههههه
امهات اخر زمن !!
مع انه مش اوفر اووووووى كده

نايس توبيك يا فانتوم
تسلم ايدك

» مبروك جالك بيبى هتسميه ايه ؟؟؟
» عريس يحطم عظام زوجتة!!!!!!
» عريس وعروسه
» عريس رخم بيستخف دمه في الصباحية
» عريس يكتب دعوة فرحو