اصحى ... فتح عنيــــك !!

لو شفت مشهد مرعب أوعي تغمض عنيك

عشان اللي هتشوفه في خيالك هيكون أفظع من الحقيقة بكتير ...

عشان كده لو مش عايز تخاف وانت بتتفرج ع المشهد ده قرب

وشك أوي منه ودقق في تفاصيله كويس

هتلاقي نقط وحروف هتوصلك لرساله ...

ده كانت كلمات عجبتني من فيلم أصحي وفتح عنيك علي لسان مصطفي شعبان.

بس الجمله عجبتني أوي لأنها فعلاً مرتبطه أوي بالواقع

-
كتير أوي مننا بيحاول يداري اللي حصل في الماضي بس أقولك حاجه!!

لما تداري اللي حصل زمان مش هو ده اللي هيحبب الناس فيك دلوقتي.

إفرض يا أخي ان وانت بتداري حاجه من حاجات الماضي ده رجعت قدامك

وقدام الناس اللي انت بتخبي عليهم ساعتها هيكون شكلك إيه!!

حاول تكون صريح مع الناس وانا متأكده 100% إنهم هيغفرولك طالما بيحبوك

أو هيسموه طيش شباب أو هيقولوا ده حصل قبل مانعرفه .. أو أو أو إلخ ..

الكلام ده مش ليك انت بس لا ليكي

انتي كمان ماتفتكريش انك لما تخبي حاجه عملتيها زمان يبقي انتي كده نجحتي

بالعكس ده ممكن يسبب مصايب في المستقبل لو اتعرف.

-
كلنا ساعات بنضطر للكذب ..

طيب انت وهي قولولي إيه اللي يخليك تكذب غير إنك خايف!!

ماسألتش نفسك قبل ماتكذب انت خايف من إيه.

بتكذب ليه مش واثق في نفسك ليه!! انا مش هقولك خليك واثق بنفسك

لا

خليك ثقتك في ربك أكبر من ثقتك في أي حد وانت

عمرك ماهتضطر تكذب مهما كانت الأسباب.

مهما كانت قوة اللي قدامك ومهما كانت سلطته قول الحقيقه

وسيبها علي الله لو في حاجه راحت منك تأكد إن هيجيلك اللي أحسن منها.

- الخوف من المستقبل:

طبعاً هو ده اللي شاغل بالك!!

خايف من بكره ..

عارفه والله انك خايف من بكره

أقولك كمان خايف من إيه!!

1- الشباب

-اللي لسه بيدرس خايف من بكره عشان مش عارف هيلاقي شغل امتي ..

وأهل البنت اللي بيحبها هيوافقوا ولا لأ

-اللي مخلص وشغال .. خايف من بكره ..

عشان مش عارف هيلحق يكون نفسه امتي.

-اللي كون نفسه .. خايف من بكره ..

عشان مش عارف هيلاقي البنت اللي تصلح للزواج ولا لأ

.. أو هيلاقي واحده يقدر يحبها ولا لأ هيتجوز أي جوازه والسلام

ولا هيتجوز اللي هو عايزها.

-حتي اللي اتجوز اللي هو عايزها .. خايف من بكره ..

هيعرف يعيش ولاده العيشه اللي كان راسمهالهم ولا لأ ..

هيكمل في الشغل ده ولا هيقدر يلاقي فرصه أحسن.

2- البنات

خوف البنات بيكون رعب!! أيوه رعب وهو لسببين

- ياتري هقابل البني ادم اللي أحبه .. وحتي لو لقيته هيتجوزني!!

-
بعد الرحله اللي دورت فيها ع البني ادم ده ..

وبعد ما لاقيته طبعا كانت عدت بتجارب كتييييييير ..

ساعتها هيكون الرعب!! ياتري وانا خارجه معاه

ممكن أقابل حد من اللي كنت اعرفهم ..

لو قابلت حد ممكن يقف ويسلم عليا !!

ده تبقي فضيحه ..

السؤال هنا بئا

-إنت خايف من إيه؟

-في جزء من الكلام لمسك!! طيب أي جزء بالظبط؟

-شايف إيه الحل لأنواع الخوف الكتير ده؟

ياريت يكون في نقااش وحوار جااد بينا

اصحى ... فتح عنيــــك !! 220666582

بجد التوبيك ده ميتوصفش

انا حاسس ان الكلام موجه ليا
وبجد توبيك تحفة كالعادة

بس سا عات يا سومة الواحد لما بيفتح عينيه
فعلا بيشوف حاجات بيندم انو شافها او عرفها
وده اللي بيخليني اخاف اني افتح عينيا
لاني خايف

شكرا يا سومة
تقبلي مروري واحترامي

فنانة يا سوما

ودايما متألقة كالعادة

بجد نايس توبيك

تسلم ايدك

و الله توبك و لا اروع تسلم ايديكي و فعلا الكلام ده مس حاجات كتير اوي بتبقى موجوده فعلا

اليومين دوووول

و مره تانيه ببدي اعجابي بالتوبيك تسلم ايديكي wae4

جزء كبير ياسومه من الي انت قولتية بجد صح وحقيقي
انا عن نفسي بفكر انا خلاص اخر سنة لية هعمل اية
ياتري هقعد في البيت ولا هلاقي شغل بمؤهلي
طب ولو لقيت شغل بس مش بالمؤهل طب انا لية كنت بتعلم وبتعب نفسي
عشان ف الاخر اشتغل اي حاجة والسلام وكمان مش بالمؤهل
بجد انا فعلا خايفة من كدة ودة اكتر حاجة شغالة تفكيري

بجد توبيك مميز وجميل ياسومة
ودة المتوقع منك دايما

بجد كل الكلام ده صحيح يا سومة
وبشكرك أوووووووووي على التوبيك المميز ده
وتسلم ايديكي يا أحلى سومة