حصريا على "مانوس وبس

كل موضوع بنقدمه بيتعلق بموضوع الماكياج بنحاول دايما نقدم حاجات جديدة ومعلومات تهمّ كل البنات...


في موضوع قبل كده اتكلمنا عن الكريمات الطبية على إنها أهم وأكثر فاعلية للبشرة..

وفي الموضوع ده هنتكلم عن إزاي ممكن نعمل الكريمات الطبية بطريقة طبيعية في البيت...



وعلى فكرة كل حاجة هنعملها
هنحتفظ بها في زجاجة صغيرة في الثلاجة ودي طبعاً طريقة اقتصادية هتوفر
كثير وفي نفس الوقت طريقة آمنة وصحية..



والمرة دي هتكون معانا "ياسمين أحمد" خبيرة التجميل اللي هتقول لنا على أسرار خاصة جداً في نضارة البشرة ووضع المكياج








كل بنت عاوزة تستخدم كريمات طبية لكن محتارة في الماركات وأسعارها وأنواعها.. إزاي البنت تقدر تعملها في البيت بطرق طبيعية؟!


أولاً: كل الكريمات الطبية هي في الأساس مكونات طبيعية وده سر نجاح
مفعولها والحاجات اللي هاقولها هتناسب جميع أنواع البشرة وبمجرد ما نعملها
هنحطها في الثلاجة..


وهنبدأ "بالغسول اليومي"


مكوناته: 2 ملعقة شوفان + ملعقة لبن بودرة + لوز مطحون + ورد مجفف..


الطريقة: هاخلط كل المكونات دي مع بعض وهاحطهم في زجاجة بس لو كان
الغسول ده هيستخدم لبشرة دهنية يبقى مش هاضيف إلى المكونات دي اللبن
البودرة.


وبالنسبة للتونيك

مكوناته: 90 جرام ماء ورد + 30 جرام زيت لوز + 15 جرام جلسرين (ونصف ليمونة) لو البشرة دهنية..


الطريقة: هاخلط كل المكونات دي مع بعض في زجاجة وعلى فكرة التونيك بيستخدم بعد الماسكات.



بنسمع عن "كريم النهار" و"كريم الليل" إزاي نعملهم في البيت بطرق طبيعية؟!


أولاً: كريم النهار


ده بيستخدم بالنهار بديل عن عازل الشمس وهو عبارة عن (4 ملاعق فازلين
على البخار. وطريقة تحضيره: بنجيب حلة ونسخنها ولما يطلع البخار نحط طبق
ألومنيوم فوق الحلة ونضع فيه الفازلين وبعد ما يسيح نضيف إليه 2 ملعقة زيت
زيتون + 1/2 ليمونة)... وكريم النهار ده بيساعد على ترطيب البشرة وعدم
ظهور تكسيرات في الوجه.









ثانيا: كريم الليل

بعد
ما أنظّف البشرة بماسك بسيط أو بماء ورد أضع كريم الليل ومكوناته (1/2 كوب
شمع عسل من عند العطار وأعمله زي طريقة الفازلين اللي فاتت وبعد كده أضيف
عليه 2 ملعقة زيت جوجوبا + 2 ملعقة جنين قمح).. والخليط ده مناسب أكثر مع
البشرة الجافة أما البشرة الدهنية هنضع 4 ملاعق فازلين + 2 ملعقة زيت لوز
+ 2 ملعقة عسل.





هل "كريم العين" مهم فعلا وإمتى البنت تبدأ تحطه؟!


هو فعلا مهم والبنت لازم تحطه بعد سن العشرين وهو عبارة عن (2 ملعقة
فازلين ونسخنها بالبخار زي الطريقة السابقة ونضيف عليها 2 ملعقة جنين
القمح + 2 ملعقة زيت اللوز)... وده بيستعمل مرة في اليوم.



إيه هي أحسن حاجة لإخفاء الرءوس السوداء؟!


بياض بيضة نغمس القطنة فيها ونغطي منطقة الأنف وبعد ما تنشف نفركها وده أسهل وأبسط طريقة وبتجيب نتيجة إيجابية.






وكريمات شد الوجه اللي بنسمع عنها وتكون غالية قوي نعملها إزاي؟!


بطريقة سهلة جداً لو عندك فراولة تهرسيها وتحطيها لمدة ربع ساعة على الوجه أو موز مهروس. والطرق دي بناء على تجربة.


عاوزة أعرف طريقة عمل "الإسكراب" وكم مرة أستخدمه؟!


أولاً: "الإسكراب" بيشد البشرة وبينعم الجلد ويؤدي إلى انكماش المسامات
الواسعة وبيوحّد لون البشرة والجسم والبشرة ويستخدم للبشرة الحساسة
والدهنية مرة كل اسبوعين والبشرة الجافة مرة كل أسبوع، وأنصح قبل
"الإسكراب" بإننا نعمل حمام بخار.


ومكونات "الإسكراب": (4 ملاعق ترمس مطحون + 4 ملاعق زيت صويا + ملعقة عسل + 2 زيت نعناع).


والطريقة: هاضع كل المقادير دي مع بعضها بكميات مناسبة لحد ما يكون
الخليط متجانس وثقيل علشان يكون مناسب لفركه على الوجه بطريقة دائرية؛ لأن
أهم حاجة في "الإسكراب" إنه يكون مناسب للفرك.





وما هي طريقة عمل "حمام البخار" في البيت؟!


نجيب حلة بها ماء ونغليها على النار وبالنسبة للبشرة الجافة نضع
(كاموميل) أو (لافندر) أما البشرة الدهنية نضع فيها (قشر برتقال) ونعرّض
الوجه للبخار ونضع فوطة على الشعر علشان البخار كله يتركز على منطقة الوجه
وده لمدة عشر دقائق.





لكن إحنا سمعنا عن "الإسكراب" بإنه مالوش نتيجة على البقع الغامقة هل ده صحيح؟!


هو فعلاً المناطق السمراء في الوجه بتحتاج ترطيب وماسكات طبيعية أفضل
من "الإسكراب" وأنصح البنات بعدم الضغط على المناطق السمراء أكثر من
اللازم من خلال "الإسكراب" لأنها تزيد الاسمرار فلازم البنت تكون حريصة
وتعالج المناطق السمراء بطرق تفتيح وماسكات طبيعية في الأول وبعدين تستخدم
"الإسكراب".


البنات دلوقتي ما عندهاش ثقة في الماسكات الطبيعية وزهقت من الأنواع الكثيرة اللي بتسمع عنها تعمل إيه؟!


أنا بانصح كل البنات إنهم ما يحيروش نفسهم لأن فيه حاجات أساسية لو
عملوها هتجيب نتيجة بسرعة وموجودة في كل بيت ومش محتاجة تروحي لعطار أو
طبيب ماسكات وأكثر البشرات التي تعاني من المشاكل هي البشرة الدهنية وفيه
طرق بسيطة وسهلة للتعامل معها زي مثلاً زبادي ونمرره على الوجه، وكمان فيه
اللبن نمرره بقطنة وده بيساعد على تفتيح البشرة، وفيه كمان النشا مع بياض
البيض ولكن أدفّيهم على النار شوية وده بيساعد على شد الوجه، وفيه كمان
زبادي مع عسل مع خميرة بيرة وده بيساعد على إزالة الجلد الميت.

وفيه طريقة مذهلة وبسيطة جداً وهي الليمون فقط بيفتح البشرة ويزيل الحبوب.



كمان بانصح أي بنت إنها تبعد عن "كريمات التفتيح" حتى ولو كان نوعها
عالمي؛ لأنها بتضر البشرة وأحسن حاجة لتفتيح البشرة هي استخدام حاجات
بسيطة زي الي قولنا عليها..





ليه البشرة الدهنية بتقشر وتتقشف؟!


ده بيكون سببه نقص مياه وما فيهاش ترطيب وعلاجها شرب مياه وعصائر
واستخدام كريم ترطيب طبيعي مكون من (زيت زيتون + زيت لوز) والماسك ده كمان
مناسب للبشرة الجافة؛ لأنها هي كمان محتاجة ترطيب.





إزاي أحط الماسكات بطريقة تستفيد منها البشرة؟!


لكل منطقة مسامات خاصة بها وعلشان كده لازم نحط الماسك بطريقة سليمة..


أولاً: منطقة الخدود بحركة دائرية لفوق.

ثانياً: منطقة القورة من بداية الحاجب وبحركة دائرية للخارج يعني من نصف الحواجب.

ثالثاً: بالنسبة للأنف من فوق لتحت بحركة دائرية.

رابعاً: بالنسبة للرقبة من تحت لفوق بحركة دائرية.

خامساً: بالنسبة للذقن من نصف الذقن لبره وكده أكون مشيت مع خطوط مسامات الوجه بطريقة سليمة.









وهل فعلاً طريقة وضع كريم الأساس تختلف عن الماسك؟!


هي بتختلف شوية وبتكون بالطريقة دي: بالأصبع الأوسط من جوه لبره في
منطقة العين؛ لأن جلدها حساس وبالنسبة للرقبة من فوق لتحت علشان نقلل
التجاعيد لكن الماسكات على العكس من تحت لفوق علشان تأخذ عناية أكثر.





نتكلم بقى عن الأسئلة المعتادة الخاصة
بالتجميل والماكياج واللي بتهم كل البنات؟! وهنبدأ بالماكياج.. البنات
محتارة إيه أحسن الماركات دلوقتي؟!


أنا في رأيي إن ماركة (كلارنس) تجمع بين التجميل والعلاج.


إزاي أعرف أختار الماسكرا الكويسة؟!


لازم تكون فرشة الماسكرا مثبتة لفوق وبالنسبة لأنواع الماسكرا الفرشة
السميكة بتتقّل الرموش، والفرشة الرفيعة الطويلة تطول الرموش.. وفيه أنواع
تجمع بين الاتنين وده حسب نوع الرموش.


وإزاي أتقّل الماسكرا؟!


أحط طبقة وبعدين أزودها وأكثر حاجة طبقتين.





بالنسبة للحواجب إزاي أملأ الفراغات اللي بتكون موجودة أحيانا؟!


آخذ فرشة وأضعها في آي شادو بني وأبعد عن اللون الأسود والفرشة بتعمل مفعول القلم وبيكون شكلها طبيعي.


فيه بنات كثير مش عارفة تحط الآي شادو بطريقة سليمة؟!


طريقة الوضع السليمة هتكون من جنب عينها لبره واللون الغامق في كسرة
العين واللون الفاتح جوه الجفن المتحرك وكل ما تكون العين صغيرة يفضّل
الألوان الفاتحة.


فيه بنات بتفضّل الكحل على الآي شادو إزاي تعمله بطريقة جذابة؟!


لو كانت عينيها ضيقة تحط لون فاتح أو كريمي وبعد كده تحط الكحل تحت
الجفن السفلي تحت رموشها وتبعد عن الأسود، وتحط ألوان زي التركواز
والأخضر.. ولو عينيها واسعة وجاحظة يفضّل إنها تحط آي شادو غامق على الجفن
المتحرك عشان يقلل الجحوظ بتاع عينيها.


ولو عاوزة تحط لونين فوق العين بطريقة حلوة؟!


أهم حاجة تحط الطبقة الأولى على الجفن المتحرك ثم تضع من آخر اللون،
وتحط اللون الجديد بحيث الاثنين يدخلوا مع بعض زي الدمج عن طريق فرشة الآي
شادو وتحت الحاجب يفضّل طبعاً لون فاتح.


وأخيراً عاوزين نعرف لمسات بسيطة عن وضع الماكياج وخاصة للقراء الجدد نبدأ بـ: إزاي أثبت كريم الأساس لفترة كبيرة؟!


كريم الأساس لازم يكون stick علشان يكون أقوى وأوزّعه بطريقة الضغط على
البشرة علشان أقفل المسام. وعلشان أثبته أكثر أبلل الإسفنجة مياه وأعصرها
جيداً علشان تعطيني طبقة رقيقة وناعمة ومش مجيرة وفي نفس الوقت ترطّب
البشرة.





إزاي أثبّت الروج أطول فترة ممكنة؟!


أختار قلم تحديد درجة حلوة وأحدد الشفايف وبعدين أستعمل قلم الروج وبعد كده أحط Gloss خفيف.


إزاي أظهر أحمر الخدود كأنه طبيعي؟!


أهم وأحلى وأبسط طريقة إن البنت تضحك وعلى عضمة الخد لما تضحك أحط أحمر
الخدود وبعد كده أضع عليه طبقة بودرة خفيفة وكده يظهر كأنه لون طبيعي..

أما بالنسبة لطريقة التوزيع فالوجه الرفيع أوزّع أحمر خدود بالعرض. أما لو
كان الوجه مدور أسحب أحمر الخدود من جنب العين علشان الوجه يرفع.

مجهود جميل جدا تسلم ايدك