MenO
مشرفه قسم الاغانى
المشاركات : 975
العمر : 32
ساكن فين؟ : Alexandria
منساوى ولا منساوية ! : 
السٌّمعَة : 0
نقاط : 151
تاريخ التسجيل : 27/06/2007
 | موضوع: مشاكل الكام يوم اللى جايين؟؟!  الثلاثاء 19 أغسطس 2008 - 13:36 | |
|
طبعا رمضان قرب و مش فاضل كتير (كل سنة وانتم طيبين ) و الناس كلها
دلوقتى اهم حاجة بتفكر فيها هى متطلبات رمضان من اكل و شرب و متطلبات
للبيت و دى مشكلة جامدة جدا عشان ارتفاع الاسعار بينى و بينكم هى مصيبة
دى عاوزة خبير اقتصادى من الدول الاوربية لكن انا لقتلها حل كويس جدا طبعا
اول حاجة هتيجى مراتك و هى مبرقة و تقولك عاوزة خزين البيت
(جالك الموت يا تارك الصلاة) ما تقلقش عندى الحل تقوم انت قايلها بالنسبة
( للحمة فهى كلاب و حمير و انامش عبيط ادفع 50 جنيه فى كيلو حمير
و بالنسبة للفراخ دى كلها هرمونات و اما السمك دة بقى مزارع و بيتغذى على الدم الفاسد ).
و تروح مكمل مش تديها فرصة تتكلم و ( الخضار و الفاكهة مرشوشة كلها مبيدات مسرطنة )
و يعنى ما ادمناش غير الفول ( نرجع لاصلنا ) طبعا كدة هى هتسكت
و مش تتكلم تانى ابدا .
شوية و هتلاقى الواد وائل ابنك داخل عليك و بيقولك بابا عاوز فانوس رمضان
زى بتاع خالد صاحبى هتقولى لا الا وائل دة الحيلة هقولك اثبت انت عارف
سعر فانوس اليومين دول كام يعمله 40 او 50 جنيه على ( اساس انه بيجيب الجزيرة )
طبعا لو قلت لابنك انك رجل موظف غلبان و عايش بالبركة هيكرهك
لانك فقير و مش قادر تجبله اللى نفسه فيه.
تقوم رادد انت عليه و قايله انا يا حبيبي خايف عليك النور اللى بيطلع من الفانوس
فى اشعاع ممكن يخليك اعمى و الرجل ابو خالد دة رجل مش بيحب ابنه
ولا بيخاف عليه كدة خلصنا من مغرز رمضان و الحمد لله .
مفيش اسبوعين و يدخل موسم المدارس ( كل سنة و انتم طيبين ) .
هتدخل البيت تلاقى الواد وائل ابنك مستمشكووووووووور و مستحمى ( ماهو طول الاسبوع
فى الشارع مع العيال ) و عامل مؤدب و يقولك بابا عاوز الكتب و الكشاكيل
و عاوز جذمة و بنطلون جديد (ليه هو مفكر نفسه عريس ) طبعا
بالنسبة للكتب هتقولى الا المذاكرة لازم اجبهمله (مع انك عارف انه
كدة كدة الامتحان بيجى من خارج الكتاب المدرسي و هيسقط هيسقط )
انت عارف اسعار الكشاكيل كام و كل مدرس عاوز جلاد لون مختلف
( اصلهم خرجين فنون جميلة ) تقوم انت قايله يا حبيبي انا خايف عليك
من شيل الكتب الثقيلة دى على ظهرك هو انا عندى غيرك
(حونين اوى ولا مفلس يا غلبان ) .
هيقولك و اشمعنا خالد صاحبى ابوه جابله الكتب و شنطة كابتن ماجد
متفكرش على طول قوله ابو خالد دة بيكره عشان بيخليه يشيل كل دة لكن
انا بحبك ( مظلوم معنا ابو خالد ) .
اما الجذمة و البنطلون طبعا انت عملت عملية ترميم و اعادة بناء
للجزمة القديمة (بقها مفتوح اربع مرات و خدت 21 غرزة ) و لفتها
كانها جديدة و البنطلون قمت باعادة قص و لزق ( مش برنامج ماما نجوى )
ما تبقى من اثار البنطلون و انقاذ ما يمكن انقاذه للتعرف على المجهول
البنطلون المغلوب على امره ( اصله واخد رصاصتين من كتر الفرك فى المدرسة )
بعد كدة تلاقى العيد داخل عليك (و كل سنة و انتم طيبين )
( مناسباتك كترت اخلص ) هتلاقى مراتك واقفالك
مبرقة عنيها نفس الوقفة اللى فاتت ( يخرب بيت اللى يزعلك ) و بتقولك
عاوزة حاجات الكحك ( ال يعنى متربية عند لابوار و هى اخرها قرص الرحمة و النور )
تقولى الا الكحك دى فرحة اثبت انت عارف كحك يعنى ايه يعنى دقيق و
سمنة و سكر و نصيبة لتكون عاوزاه بالمكسرات ( نصيحة حاول تجيب
ورقة الاعلانات بتاعة كارفور اللى عليها اسعار الاغذية عشان تفرج الواد وائل شكلها )
عشان لو اتعزمت عند مديرك ولا حاجة و قدملك كنافة الواد وائل ميقولكش
بابا فى حاجة بتكسر عشان الفضيحة (ال يعنى مديرك بيجيب مكسرات
هو السودانى مكسرات ) و ساجات طالعة و ساجات نازلة و ادفع انت يا ريس
وانت عارف الستات بيحبوا يعملوا الكحك عشان يلعبو بالعجينة
( مكنش فى صلصال على ايامها وهى طفلة ) و فى الاخر بيبوز و يتحرق
تقوم عامل انك دايخ و حاسس بهبوط و تخرج على انك رايح للدكتور و ترجع
تقولها ان جالك السكر ( بشر على نفسك احسن ما تتفضح يا مفلس )
طبعا هى هتقولك بلاش كحك دة بيرفع السكر شوية كدة و هتلاقى الواد وائل
ابنك (الله يخرب بيت وائل )مستمشكووووووووور و مستحمى (هو الواد دة مش بيستحمى
الا لما يعوز حاجة ) و بيقولك بابا (كتك بو )عاوز لبس العيد هتقولى
دة عيل و لازم يفرح خد عندك
لبس العيد يعنى ايه يعنى ( بنطلون جينز يعنى قميص
يعنى اميجو بينور ) عاوز بدلة ظابط زى بتاعة خالد ( قطيعة تقطع خالد )
تعمل ايه تقوله لا يا حبيبي الا بدلة الظابط انت مش عارف بيعملوا فيهم ايه؟؟
الظابط دة بيضربوه بالنار ( لما يكبر هيعرف اللى بيعملوه الظباط فى السجون ) .
( وابقى قابلنى لو الواد وائل دة ما انضمش لتنظيم التوربينى
الثورى واصبح اكبر مناضل فى شم الكلة يا ريس )
دة كان حل ساخر منى للضحك و لكن سؤالى الان :
*هل تعلم ان رمضان 1 سبتمبر و المدارس 20 سبتمبر و العيد 1 اكتوبر !!!!!
*هو مرتب المواطن المصرى كام ؟؟؟؟؟
*هو المواطن المصرى هيجيب مصاريف رمضان و المدارس و العيد ازااااااااااى؟؟؟؟؟؟؟؟
*هل يوجد اماكن كافية فى عمر مكرم لمراسم التعزية ؟؟؟؟؟؟؟؟
*هل يوجد اماكن فاضية فى الصرايا الصفراء لاستقبال الوفود ؟؟؟؟؟
تحيـــــــــــــاتى
| |
|
only_you
مشرف المنتدى العام
المشاركات : 3927
العمر : 37
ساكن فين؟ : اكيد فى بيتنا يعنى
بتشتغل اية؟ : بدور على شغل فمش فاضى اشتغل
منساوى ولا منساوية ! : 
السٌّمعَة : 11
نقاط : 3979
تاريخ التسجيل : 26/06/2008
| | موضوع: رد: مشاكل الكام يوم اللى جايين؟؟! الثلاثاء 19 أغسطس 2008 - 15:50 | |
| والله فكره حلوه هاطبقها لما اتجوز | |
|
