ماسبب مضايقة الشاب للبنت في الاسواق
انا شايفة ان المشكلة في لبس البنت انما في تفكير الشباب نفسهم دلوقتى اى بنت حتى ولو لابسة محترم بتتعاكس بكلام مش محترم
-هل تعقديين ان الشباب هو من يبداء في معاكسة البنت
مش شرط انا شفت بنفسي بنات بتعاكس شباب وهما اللي بيحاولوا يلفتوا نظرهم
_ ماسبب عدم احتشام البنات اثناء خروجهم
البنت حسب ما اتعودت او اتربت فيه بنات بالنسبة لها لبس الضيق او العريان ده عادي
-هل تعقدين ان التفتح هو سبب ظهور هذه الفتن مثل الكليبات والفضائيات الهابطة
زمان برضه كان فيه تفتح وسينما وحاجات كتير بس احنا بنقول كده دلوقتى عشان الموضوع بقي متاح في كل بيت وحتى الاطفال بيتفرجوا علي كل حاجة
- هل تتدخل اسرتك في انتقاء ملابسك يضايقك ويحسسك بعدم الرضاء عن نفسك
انا من فترة قريبة ايام الجامعة ما كنتش محجبه واسرتي دايما كانوا بيكلمونى عن لبسي وحجابي بس كنا بنختلف كتير وكنت بعند معاهم جدا بس الحمد لله بعد الحجاب بتقبل اي نقد عشان عارفة ان ده اكيد في مصلحتى بس هى بتكون عند لان عمر الاهل ما بيكونوا عايزين حاجة لاولادهم غير الخير
-تعتقدين ماهو سبب ابتعاد البنت عن امها او اهلها او حتى اخوها وممكن انها تقول لصديقاتها اشياء ماتقولها لامها مع ان هذي امها
بصراحة الام هي السبب لو اديت احساس لبنتها انها ممكن تكون زى صديقتها و تقبل كلامها وتوجها بطريقة مفيهاش عنف او احساس بان ده الصح عشان كده وبس وما اتنقشتش معاها متهيالي ان البنت حتتوجه من نفسها لامها وانا اعرف امهات لاصدقائي كتير واخدين بناتهم كاصدقاء وده بجد ياريت اي ام تفكر فيه وما تفكرش انها ام بتدي اوامر وتلوم وتتخانق وبس
- مامدى تاثير اصدقائك على طباعك وشخصيتك
ده متهيالى بيتوقف علي شخصية كل واحد يعني اللي شخصيته ضعيفة او مهزوزة وما عندوش ثقة بنفسه بيتاثر اوى باصحابه او بالجو عامة اللي بيعيش فيه .
انا متشكرة جدا بجد اسالتك جميلة وياريت الكل يشارك برايه ونستفيد كلنا ويارب التوفيق للكل في حياته
